‘Do të preferoja të isha në ferr’/ Britania në zi për vdekjen e 12-vjeçares, dyshohet se po përballej me bullizëm

Vajza, e përshkruar nga familjarët si një “nxënëse model”, dyshohet se po përballej me vështirësi përshtatjeje pas kalimit në një shkollë të re. Miqtë e saj u thanë autoriteteve se Angel kishte pasur probleme me pranimin shoqëror dhe njëra prej tyre pretendoi se ajo ishte ngacmuar nga një grup vajzash.

Pak para vdekjes, 12-vjeçarja thuhet se i kishte thënë një shoqeje se “do të preferonte të ishte në ferr sesa në shkollë”.

Babai i saj, Eliud Matidi, dëshmoi gjatë hetimit të mjekut ligjor në Bournemouth se vajza kishte filluar gradualisht të tërhiqej nga familja dhe shoqëria. Sipas tij, Angel kalonte gjithnjë e më shumë kohë në telefon, duke parë video në YouTube dhe duke luajtur Minecraft.

Trupi i Angel u gjet rreth orës 07:30 të mëngjesit. Gjatë kontrollit të telefonit të saj, autoritetet zbuluan se 12-vjeçarja kishte shkëmbyer mesazhe në Snapchat deri rreth orës 05:00 të asaj dite.

Megjithatë, kontrolli i telefonit dhe tabletit të saj nuk zbuloi prova për ngacmim kibernetik apo kërkime që lidhen me vetëvrasjen. Vajza nuk kishte lënë një shënim dhe, sipas hetimit, nuk kishte treguar te miqtë e saj për ndonjë qëllim të tillë.

Babai i saj tha se kalimi nga shkolla fillore në Akademinë Cornerstone në Hamworthy kishte qenë veçanërisht i vështirë për të.

“Ishte një shkollë shumë më e madhe dhe ajo ngurronte shumë të shkonte. Ajo humbiste shumë orë mësimi dhe performanca e saj akademike u ndikua”, dëshmoi ai. Megjithatë, ai tha se kishte besuar se Angel po i kapërcente vështirësitë, pasi frekuentimi i saj në shkollë ishte përmirësuar dhe ajo kishte krijuar një grup të ri miqsh.

Eliud Matidi e përshkroi vajzën e tij si “dritën” e familjes, duke kujtuar se në shkollën fillore ishte një nxënëse shembullore, e sjellshme dhe nuk kishte shkaktuar probleme.

Ai tregoi gjithashtu se në mëngjesin e 17 marsit ishte përpjekur tri herë ta zgjonte për të shkuar në shkollë, por nuk kishte marrë përgjigje.

Mjeku ligjor i Dorsetit, Brendan Allen, e konsideroi vdekjen e 12-vjeçares si pasojë e varjes, por theksoi se “qëllimi i saj nuk u shpjegua nga provat e paraqitura”.

Top Channel