Të ardhurat nga tatimi mbi fitimin janë zëri me ecurinë më të dobët në buxhetin e shtetit në tetë muajt e pa...
SHOWBIZ
12 vite pas aksidentit, Corinna Schumacher rrëfen dhimbjen dhe jetën larg syrit të publikut: Kur dëgjoj këngën tonë...
PiranjatPërditësimi i fundit 25 Shtator 2026, 10:13
Kanë kaluar 12 vite nga aksidenti i rëndë që ndryshoi përgjithmonë jetën e Michael Schumacher. Bashkëshortja e tij, Corinna Schumacher, ka dhënë një rrëfim të rrallë për marrëdhënien e tyre, kujtimet nga vitet e para dhe jetën që familja ka zgjedhur të mbajë larg vëmendjes së publikut.
Corinna shfaqet në dokumentarin e ri të Netflix, “Schumacher ’94: The Birth of a Legend”, i cili i kushtohet sezonit të vitit 1994, kur Michael Schumacher fitoi titullin e tij të parë botëror në Formula 1 me skuadrën Benetton.
Duke kujtuar fillimet e lidhjes së tyre, Corinna tregon se kënga “Rush Rush” e Paula Abdul kishte një domethënie të veçantë për çiftin.
“Ajo ishte kënga jonë atëherë. Kur e dëgjoj sot dhe jam në makinë, qaj me vete”, rrëfen ajo. Corinna kujton gjithashtu se nëna e saj nuk e kishte mbështetur fillimisht lidhjen me Schumacher. Sipas saj, Michael kalonte shumë kohë në pistën e kartingut dhe kjo kishte ndikuar në mënyrën se si nëna e saj e shihte atë në fillim.
Në dokumentar, ajo ndan edhe episode nga vitet e para të karrierës së pilotit gjerman. Corinna tregon se Schumacher merrte letra të shumta nga fansat dhe se mes tyre ishte edhe një vajzë e quajtur Jutta, e cila i dërgonte vazhdimisht të brendshme së bashku me letrat e saj. Sipas Corinnës, emri i saj u kthye më pas në një shprehje të zakonshme të përdorur nga Schumacher.
Duke folur për emocionet që përjetonte gjatë garave të bashkëshortit të saj, Corinna shprehet:
“Zemra ime rreh për të kur fiton. Dhe kur humbet. Zemra ime është gjithmonë aty.” Dokumentari nuk sjell detaje të reja konkrete për gjendjen aktuale të Michael Schumacher. Familja e shtatë herë kampionit të botës në Formula 1 ka ruajtur prej vitesh një privatësi të rreptë rreth jetës së tij pas aksidentit të 29 dhjetorit 2013, kur ai pësoi një dëmtim të rëndë gjatë skijimit në Alpet franceze.
Që prej asaj kohe, Corinna ka qëndruar pranë bashkëshortit të saj, së bashku me një ekip kujdestarësh, infermierësh dhe terapistësh.
Në dokumentarin e vitit 2021 për jetën e Schumacher, Corinna kishte thënë se Michael ishte ende me familjen, edhe pse “ndryshe”, dhe se ata vazhdonin të bënin gjithçka për ta ndihmuar dhe për t’i siguruar kujdesin e nevojshëm.
“Privatja është private”, kishte deklaruar atëherë Corinna, duke nënvizuar rëndësinë që familja i kushton mbrojtjes së jetës private të Michael Schumacher.
