Skandali Hyseni-Agasi/ Kush e përgënjeshtron valën e "fake news"-eve?

Më 22 shtator, SPAK-u zhvilloi një operacion të gjerë, ku me vendim të Gjykatës së Posaçme u vendosën masat e sigurisë arrest shtëpie dhe pezullim nga detyra për ish-drejtoreshën e SHISH, Vlora Hysenin, arrest me burg për shtetasin Fatjon Kalluci, “Përgjegjës Sektori” në Institutin e Policisë Shkencore dhe Embro Sulejmanin, punonjës i shoqërisë “Agroturizëm Kodra e Kuajve”.

Një operacion, që pasoi më tej zbardhjen e detajeve nga dosja hetimore, publikimin e komunikimeve mes ish-drejtueses së SHISH, Vlora Hysenit dhe Ergys Agasit, informacionet që ishin dërguar tek Agasi, raportimet e Hysenit tek Agasi për takimet me zyrtarë të lartë, diagramet me informacione të SHISH-it, të gjetura në makinën e Ergys Agasit, qindra telefonatat mes tyre etj.

Një skandal që tregoi se shteti ka rënë.

Duke parë publikimin e të dhënave nga dosja hetimore në media, GJKKO si në shumë raste të tjera për çështje sensitive, njoftoi për vendimin e ndalimit të publikimit tërësisht apo pjesërisht të këtij vendimi gjyqësor deri në përfundim të hetimeve paraprake.

Që nga ky moment, CNA ka respektuar vendimin e GJKKO-së për të mos vijuar me publikimin e vendimeve, por nga ana tjetër mediat po gëlojnë nga "fake news"-e, mashtrime, shantazhe, gjobëvënie etj.

Çfarë nuk po shkruhet nëpër mediat online nën pretendimin se janë detaje nga dosja apo komunikime të tjera mes Vlora Hysenit dhe Ergys Agasit, jo fikja e radarëve, që edhe ky është një "fake news".

Të gjitha këto detaje po rrjedhin në mënyrë të shpejtë në mediat online, ku përmes mashtrimeve, shantazheve apo gjobëvënies sulmohet biznesi, politikanë të ndryshëm, persona të tjerë të njohur.

Problemi qëndron: Kush i përgënjeshtron këto "fake news"-se?

Gjykata thotë mos publikoni detajet nga dosja hetimore, ne po respektojmë rregullat, por ajo që po ndodh aktualisht është se përmes "fake news"-e po shantazhohen biznesmenët duke thënë se janë gjetur emrat e tyre në përgjimet e Vlora Hysenit, në telefonin e Ergys Agasit, nga ana tjetër politika bën presionin e saj, u thuhet deputetëve që janë në përgjimet e Agasit.

Duke parë të gjithë këtë zhurmë, lind pyetja: Si mund të mos lejohet publikimi i një vendimi gjyqësor ku nga ana tjetër po dëmtohet procesi, po dëmtohen politikanë, biznese, u thuhet jeni në celularët e Agasit, jeni në përgjimet e Vlorës.

Ligji mund t’i detyrojë mediat që të mos publikojnë materiale, por SPAK-u ka për detyrë të bëjë transparencë se në emër të vendimit po prodhohen lajme të rreme.

Ne po e respektojmë vendimin, po të tjerët?

Dikush mund ta quajë “xhungël”, por kjo duhet zgjidhur. Ndoshta prokurorët s’kanë kohë të përgënjeshtrojnë gazetarët, por një njoftim për transparencë për "fake news"-et që dalin, kostot e të cilave bien mbi biznesin, pasojat e të cilave bien mbi administratën, SPAK-u duhet ta bëjë për të shmangur gjobëvënien dhe tallavanë e pandalshme të politikës./ CNA