Rrjeti SafeJournalists reagoi të premten për rastin e shoqërimit nga policia të gazetares së Citizens.al, Vjolanda Peca gjatë raportimit nga protesta e së enjtes, duke shprehur ‘shqetësim serioz’ për faktin se telefoni i saj celular vijon të mbahet nga policia edhe pas lirimit.
Sipas organizatës që mbron të drejtat dhe lirinë e gazetarëve, Peca po mbulonte protestën në cilësinë e saj si gazetare kur u shoqërua nga efektivët e policisë dhe u mbajt në komisariat dhe se ajo ka deklaruar se policia nuk i ka dhënë asnjë shpjegim për arsyet e sekuestrimit të telefonit të saj.
“Sekuestrimi apo mbajtja e pajisjeve të punës së një gazetari kërkon garanci të posaçme. Telefonat e përdorur nga gazetarët mund të përmbajnë materiale të papublikuara, komunikime me burime dhe informacione të tjera të mbrojtura nga konfidencialiteti gazetaresk. Çdo ndërhyrje në këto materiale duhet të ketë një bazë të qartë ligjore, të jetë e nevojshme dhe proporcionale dhe të shoqërohet me garanci efektive për mbrojtjen e burimeve dhe informacionit konfidencial të gazetarëve,” thekson Rrjeti SafeJournalists në deklaratën publike.
Organizata i bën thirrje Policisë së Shtetit dhe autoriteteve kompetente që të sqarojnë menjëherë bazën ligjore për shoqërimin në komisariat të gazetarës si dhe për sekuestrimin dhe vijimin e mbajtjes së telefonit të saj dhe t’ia kthejnë pa vonesë pajisjen, përveçse nëse vijimi i mbajtjes së saj mbështetet në një masë të ligjshme, të nevojshme dhe proporcionale, të shoqëruar me garancitë e duhura procedurale.
Rrjeti thekson se “çdo sulm ndaj gazetarëve është sulm ndaj demokracisë, interesit publik dhe të drejtave themelore të njeriut”.
Media Citizens.al e konsideroi aktin si “pengim i drejtpërdrejtë i punës gazetareske” duke vlerësuar se gazetarët duhet të raportojnë nga terreni pa pengesa dhe pa ndërhyrje.
Edhe Asociacioni i Gazetarëve të Shqipërisë (AGSH) reagoi të premten duke i bërë thirrje policisë që t’i kthejë telefonin gazetares.
“Telefoni është mjet pune për gazetaren dhe mund të përmbajë pamje të papublikuara, komunikime me burime konfidenciale dhe të dhëna personale. Mbajtja e tij mund të pengojë raportimin dhe të rrezikojë mbrojtjen e burimeve”- thotë AGSH në qendrimin publik.
Po ashtu AGSH e konsideroi shoqërimin e saj në policie si një akt të ndërmarrë në kushte tërësisht të papërshtatshme duke qenë se nga dokumentimi i pamjeve filmike Peca ka qenë qartësisht e identifikueshme si gazetare.
Organizata po ashtu e konsideron këtë ngjarje si “një përshkallëzim i rrezikshëm i sjelljes së Policisë ndaj gazetarëve dhe mediave në tërësi”.
