"Territorialja" dhe halli i Erion Veliajt

Gjykata e Lartë e la Erion Veliajn në burg më 15 shtator. Një javë më pas, papritur del në skenë një hall i madh shtetëror. Reforma administrativo-territoriale paska nevojë pikërisht për praninë fizike të kryetarit të Bashkisë së Tiranës.

Problemi është se letra që e hap këtë histori nuk thotë këtë. Shkresa e Arbjan Maznikut është shumë më pak dramatike. Ajo kërkon që kryetari i bashkisë të japë mendimin e tij zyrtar dhe të argumentuar për propozimin. Pastaj, më vete, kërkon që Këshilli Bashkiak ta shqyrtojë propozimin dhe të miratojë mendimin e tij. Dhe, përsëri më vete, kërkon që Bashkia të organizojë informimin dhe konsultimin e popullatës.

Pra janë tre procese të dallueshme, jo një mbledhje ku kryetari duhet patjetër të ulet në karrigen e Këshillit për të shpëtuar reformën territoriale.

Nëse Erion Veliaj ka një mendim zyrtar për hartën e re territoriale, ligjërimi i shkresës nuk e lidh këtë mendim me praninë e tij fizike në mbledhjen e Këshillit. Mendimin mund ta japë në formën zyrtare që kërkohet dhe ta përcjellë pranë institucionit përkatës. Këshilli jep më pas mendimin e vet. Bashkia bën konsultimet me qytetarët. Kaq.

Por këtu fillon të bëhet interesante. Interesante sepse, nëse kryetari i bashkisë është në burg dhe duhet të japë një mendim institucional, problemi administrativ është shumë më i vogël nga sa po paraqitet. Dokumenti i Maznikut nuk kërkon një shfaqje teatrale me kryetarin që nxirret nga qelia, futet në makinë, shkon në Këshill, jep mendimin dhe kthehet përsëri në burg. Ai kërkon një mendim zyrtar dhe të argumentuar. Në fakt këtë ja kërkon të gjitha bashkive.

Në fund të fundit, nëse mendimi është i Veliajt, le ta japë Veliaj. Nga burgu. Mund ta shkruajë, ta firmosë në formën e lejuar ligjërisht dhe ta përcjellë për shqyrtim. Nuk ka ndonjë arsye që reforma territoriale të kthehet në justifikimin e radhës për një ekskursion institucional nga qelia në Bashkinë e Tiranës.

Madje, po të pranojmë logjikën e kërkesës, problemi bëhet edhe më i çuditshëm. Këshilli duhet të japë mendimin e vet, ndërsa Bashkia duhet të bëjë konsultimet me popullatën. Asnjëra prej këtyre nuk kërkon që kryetari të jetë fizikisht aty për të mbajtur peng gjithë procesin.

Kështu, një proces që në shkresë është ndërtuar në tri hallka të ndara, po përpiqet të shitet si një arsye për ta nxjerrë kryetarin nga burgu.

Nëse Erion Veliaj ka mendim për Territorialen, le ta japë. Madje mund ta japë nga burgu, me gjithë solemnitetin institucional që kërkon detyra. Pastaj Këshilli të japë mendimin e vet dhe qytetarët të bëjnë konsultimin e tyre.

Nuk ka pse Territorialja të bëhet Territoriale + Erion Veliaj. Një reformë e hartës së bashkive nuk është arsye që harta e burgut të ndryshojë. /CNA