Hipokrizia e këshilltarëve/ Dje e shkarkuan, sot e duan në mbledhje

Me votim të hapur dhe unanim, anëtarët e Këshillit Bashkiak të Tiranës, miratuan propozimin për shkarkimin e kryebashkiakut të arrestuar të Tiranës, Erion Veliaj, më datë 23 shtator të vitit të kaluar.

Si këshilltarët socialistë dhe ato të opozitës bënë bashkë votat për shkarkimin e kryebashkiakut ndaj të cilit rëndojnë 13 akuza për 5 vepra të rënda penale.

Propozim i cili më pas u firmos nga Prefekti i Tiranës, një ditë më pas Këshillit të Ministrave, i cili më 25 shtator miratoi shkarkimin e Erion Veliajt nga detyra e kryebashkiakut.

Ndërkohë sot, pas një viti, ish-deputeti i Lulzim Bashës, Halit Valteri, i cili është kthyer në vegël të 99-çave të “Rilindjes” mbledh firmat dhe kërkon Erion Veliajn, të cilin e shkarkuan, ta kenë ose prezent në sallë, ose me video-konferencë.

Ky është propozimi që i është bërë Prokurorëve dhe Drejtorisë së Burgjeve.

E gjithë i ngjan një skene hipokrizie, sepse ata që dje e shkarkuan sot e duan prezent në mbledhje. Lind pyetja, si do ta shohin si kryetar bashkie apo si kryetar të shkarkuar.

Pasi e vërteta është se këto këshilltarë vetëm e shkarkuan Erion Veliajn, nuk e sollën në detyrë. Ishte Gjykata Kushtetuese ajo që e riktheu sërish në detyrën e kryebashkiakut.

Në fakt mund të ketë dhe një propozim të tretë që anëtarët e Këshillit Bashkiak që kanë shkarkuar Erion Veliajn, me kërkesë të këtij të fundit që ky mos të lëvizë nga “rehatia” në burgun e Durrësit, të shkojnë dhe ta zhvillojnë në ambientet e paraburgimit mbledhjen.

Ky është një propozim, ndoshta një ide që qarkullon, ndonëse e rëndësishme është që të mos mërziten këta anëtarët e Këshillit që e shkarkuan dhe e hodhën si leckë dhe sot duan ta kenë prezent si kryetar në mbledhje.

Por siç e thamë dhe më herët, mendimin për “Territorialen”, Veliaj mund ta japë dhe nga burgu pa qenë e nevojshme të jetë i pranishëm fizikisht në mbledhje.

Mund ta shkruajë, ta firmosë në formën e lejuar ligjërisht dhe ta përcjellë për shqyrtim dhe e gjithë kjo mos të kthehet në një nga skemat e shumta, por të dështuara të Veliajt për të dalë nga qelia për pak kohë. /CNA