Një alpinist britanik 28-vjeçar ka humbur jetën në Spanjë, pasi ka rënë rreth 60 metra nga një prej majave më të larta në veri të vendit.

Aksidenti ndodhi të enjten në Torrecerredo, në Malet Cantabria, pjesë e masivit të Picos de Europa. Sipas Gardës Civile Spanjolle, alpinisti ra në një përrua teksa po zbriste nga maja e malit.

Shërbimet e emergjencës u njoftuan rreth orës 13:27 me orën lokale, pas raportimit se një person kishte rënë në faqen lindore të malit. Në vendngjarje u dërguan një grup shpëtimi dhe një helikopter mjekësor.

Një mjek që ndodhej në ekip konfirmoi vdekjen e alpinistit rreth orës 14:18 dhe qëndroi në vendngjarje për të ruajtur trupin, deri në mbërritjen e një helikopteri të Gardës Civile, rreth një orë e 20 minuta më vonë.

Më pas, specialistët e shpëtimit malor u ulën me vinç në zonën e aksidentit, ku nxorën trupin e viktimës dhe sendet e tij personale.

Identiteti i alpinistit nuk është bërë publik. Autoritetet spanjolle kanë konfirmuar se ai ishte anglez dhe se ndodhej rreth 20 metra larg majës së Torrecerredo kur ndodhi aksidenti.

Trupi është transportuar në Institutin e Mjekësisë Ligjore në Asturias, ku do t’i nënshtrohet procedurave përkatëse mjeko-ligjore.

Edhe Ministria e Jashtme britanike konfirmoi se ishte në kontakt me autoritetet lokale pas raportimeve për vdekjen e një shtetasi britanik në Spanjë.

Torrecerredo, me një lartësi prej rreth 2,650 metrash, ndodhet në zonën e Picos de Europa, një destinacion i njohur për alpinistët dhe turistët që praktikojnë ecjen malore.

Autoritetet lokale të turizmit e cilësojnë itinerarin për ngjitjen e Torrecerredos si “shumë të vështirë”, duke paralajmëruar për terrenin e pjerrët dhe të ekspozuar, veçanërisht në pjesët e sipërme gjatë zbritjes.