U qëllua me armë gjatë një tubimi të Trump në Pensilvani/ 76-vjeçari humb jetën pas dy vitesh

Një nga tre personat që u qëllua me armë zjarri gjatë tubimit elektoral të Donald Trump në Butler të Pensilvanisë, në vitin 2024, ka ndërruar jetë për shkak të komplikacioneve të shkaktuara nga plagët e marra. Jim Copenhaver, 76 vjeç, u qëllua dy herë kur një person i armatosur hapi zjarr nga çatia e një godine aty pranë.

Një tjetër pjesëmarrës, Corey Comperatore, u vra gjatë sulmit, ndërsa Trump u prek nga një plumb në vesh. Copenhaver ndërroi jetë të mërkurën në një spital në Pittsburgh, Pensilvani, sipas një deklarate të zyrës së mjekësisë ligjore të qarkut Allegheny, të shpërndarë në mediat lokale. Sulmuesi, 20-vjeçari Thomas Crooks, u vra nga agjentët e Shërbimit Sekret pasi hapi zjarr.

Në një postim në rrjetin e tij social Truth Social, Trump e cilësoi Copenhaver si një “patriot të vërtetë amerikan”.

“Para më shumë se dy vitesh, në Butler, Pensilvani, një person i armatosur i çmendur u përpoq të heshtte Lëvizjen tonë America First. Në vend të kësaj, Jim dhe shumë patriotë të tjerë të mrekullueshëm që e duan vendin tonë u bashkuan në mbrojtje të vlerave tona të përbashkëta të Lirisë, Drejtësisë dhe të drejtave tona. Zemrat dhe lutjet tona janë me familjen Copenhaver, veçanërisht me bashkëshorten e tij të mrekullueshme, Marianne”, shkroi Trump. 

Në një intervistë për CBS, një vit pas tubimit në Butler, Copenhaver dhe David Dutch, personi i tretë që u qëllua, treguan se kishin kaluar infeksione dhe ndërhyrje të shumta kirurgjikale pas plagosjes. Copenhaver u qëllua në krah dhe në bark. Një vit më vonë, plumbi vazhdonte të ishte në trupin e tij, pranë shtyllës kurrizore. Ai i tha CBS se kjo e detyronte të ecte me bastun.

Në qershor, si Dutch ashtu edhe Copenhaver ngritën padi ndaj qeverisë federale për dëmshpërblim, duke argumentuar se Shërbimi Sekret nuk kishte garantuar sigurinë e tyre dhe për këtë arsye duhej të mbante përgjegjësi për plagosjet. /CNA