Legjenda e futbollit brazilian dhe ish-mbrojtësi i Real Madridit, Roberto Carlos, ka rrëfyer një nga periudhat më të vështira të jetës së tij, duke zbuluar se si një krizë financiare dhe familjare e la në një situatë dramatike.
Ish-futbollisti brazilian, i cili gjatë karrierës së tij fitoi trofe të shumtë me Real Madridin dhe kombëtaren e Brazilit, tregoi se pasuria e krijuar ndër vite në futboll u vu në rrezik për shkak të një konflikti me një ish-agjent dhe një problemi të rëndë familjar.
Sipas rrëfimit të tij, gjithçka ndodhi brenda pak orësh. Roberto Carlos tha se shkoi të flinte të enjten në mbrëmje pa e ditur se të nesërmen do të përballej me një situatë financiare që do t’i ndryshonte jetën.
“Pata një problem serioz me një ish-agjentin tim, shoqëruar me një telash shumë të madh familjar. Të enjten shkova në shtrat në mesnatë, ndërsa të premten në mëngjes u zgjova përballë një pirgu me letra, ekzistencën e të cilave nuk e dija”, rrëfeu braziliani.
Ai tha se në atë moment humbi kontrollin mbi situatën financiare dhe mbi atë që kishte ndërtuar gjatë karrierës së tij.
“Aty humba çdo kontroll mbi historinë time, mbi gjithçka që kisha ndërtuar në futboll. Brenda një dite humba 99% të gjithçkaje që kisha fituar”, deklaroi Roberto Carlos.
Rrëfimi i ish-mbrojtësit tregon anën më pak të njohur të jetës së një prej figurave më të famshme të futbollit botëror. Me fanellën e Real Madridit, Roberto Carlos u shndërrua në një prej mbrojtësve më të njohur të brezit të tij, ndërsa ishte për vite me radhë një prej shtyllave të kombëtares braziliane.
Pavarësisht goditjes së rëndë financiare, ai tha se arriti të rimerrte kontrollin e situatës përmes një procesi ristrukturimi.
“Më pas, fatmirësisht, ia dola të ristrukturoja situatën time financiare dhe atë familjare”, u shpreh ish-futbollisti.
Rrëfimi i Roberto Carlos vë në pah se pas suksesit dhe pasurisë së krijuar gjatë viteve të karrierës sportive, ai u përball me një krizë të papritur që e detyroi të rindërtonte nga e para një pjesë të rëndësishme të jetës së tij financiare dhe familjare.