Ndeshja Shqipëri-Bjellorusi/ Policia publikon masat, ja rrugët që bllokohen nga ora 17:00 në Tiranë

Ndeshja mes Shqipërisë dhe Bjellorusisë do të zhvillohet sonte në orën 20:45 në stadiumin “Air Albania”, ndërsa për shkak të fluksit të tifozëve do të ketë kufizime të përkohshme në qarkullimin e automjeteve në disa prej akseve pranë stadiumit.

Masat do të jenë në fuqi nga ora 17:00 deri në përfundim të ndeshjes. Qëllimi është menaxhimi i lëvizjes së tifozëve dhe automjeteve në zonën përreth stadiumit.

Akset ku do të ketë bllokime ose devijime janë:

Bulevardi “Dëshmorët e Kombit”, nga zona pranë urës së ish-Hotel Dajtit;

Rruga “Papa Gjon Pali II”, te kryqëzimi i RTSH-së;

Rruga “Dervish Hima”, pranë Ambasadës së SHBA-së;

Rruga “Asim Zeneli”, pranë Ambasadës së SHBA-së;

Rruga “Themistokli Gërmenji”, në hyrje;

Rruga “Ismail Qemali”, te kryqëzimi i RTSH-së;

Rruga “Lekë Dukagjini”, pranë ish-Gardës së Republikës, e aksesueshme vetëm për mjetet e autorizuara nga FSHF-ja;

Rruga “Abdyl Frashëri”, pranë kryqëzimit të Librit Universitar;

Në sheshin “Wilson”, ku lëvizja do të devijohet në drejtim të rrugës “Sami Frashëri” pak para përfundimit të ndeshjes.

Ndërkohë, Rruga e Elbasanit, Unaza dhe bulevardi “Bajram Curri” do të vijojnë të jenë të hapura për qarkullimin e automjeteve.

Tifozët që do të ndjekin ndeshjen në stadium do t’i nënshtrohen kontrolleve në hyrje. Nuk do të lejohet futja e sendeve të rrezikshme, fishekzjarrëve, flakadanëve, materialeve piroteknike, monedhave metalike, çadrave, çakmakëve, karikuesve të celularëve dhe banderolave me përmbajtje raciste.

Për të shmangur radhët dhe vonesat në hyrje, tifozëve u këshillohet të mbërrijnë në stadium duke nisur nga ora 18:30.

Për mbarëvajtjen e aktivitetit sportiv dhe menaxhimin e fluksit të tifozëve do të ketë prani të shtuar të forcave të rendit në zonën përreth stadiumit.