Një rast i rëndë ka shkaktuar zemërim në Pakistan, ku një burrë është arrestuar pasi dyshohet se kishte rënë dakord t’ia jepte vajzën e tij vetëm 3-vjeçare për martesë një burri 60-vjeçar, kundrejt rreth 2.5 milionë rupive pakistaneze, afro 7 mijë paund. Sipas policisë, Abdul Baqi, nga qyteti kufitar Chaman në Balochistan, kishte arritur marrëveshjen me 60-vjeçarin Salah Uddin.
Marrëveshja ishte bërë në kuadër të traditës së vjetër të quajtur “walwar”, sipas së cilës familja e burrit i jep para familjes së vajzës në këmbim të martesës. Rasti u bë publik dhe shkaktoi reagime të forta, duke nxitur autoritetet të nisnin hetimet. Policia zbuloi se marrëveshja ishte formalizuar në letër, por paratë ende nuk ishin dorëzuar. Sipas raportimeve, pasi të kryhej pagesa, vajza 3-vjeçare do të konsiderohej bashkëshortja e 60-vjeçarit.
Babai i vajzës është arrestuar, ndërsa Salah Uddin është zhdukur dhe po kërkohet nga policia. Hetimi është lidhur gjithashtu me vrasjen e motrës së madhe të vajzës, Shukriya Bibi, rreth dy javë më parë në Kuchlak, në periferi të Quettas. Shukriya ishte nusja e djalit të Salah Uddin. Bashkëshorti i saj është arrestuar nën dyshimin për vrasjen, ndërsa autoritetet po hetojnë nëse një konflikt i fundit mes dy familjeve lidhet me ngjarjen.
Në Balochistan, martesat e fëmijëve janë të ndaluara. Një ligj i vitit 2025 ndalon martesën e personave nën 18 vjeç me të rritur. Burrat e rritur të dënuar për martesë me fëmijë mund të përballen me deri në tre vite burg dhe gjobë deri në 200 mijë rupi pakistaneze. Pavarësisht rënies së numrit të martesave të fëmijëve në Pakistan, fenomeni mbetet problem. Sipas të dhënave të UNICEF-it të cituara në material, më shumë se një në pesë vajza nën 18 vjeç në Balochistan martohen para kësaj moshe.
