Një 50-vjeçar është arrestuar në Shkodër në kuadër të operacionit policor të koduar “Muri i Lartë”, të zhvilluar nga Policia e Shtetit në bashkëpunim me BKH-në, nën drejtimin e SPAK-ut. Operacioni është finalizuar në orët e para të mëngjesit të sotëm, me qëllim ekzekutimin e masave të sigurisë të caktuara nga Gjykata e Posaçme, si dhe kryerjen e kontrolleve për lokalizimin e një tjetër personi të shpallur në kërkim.
Sipas Policisë së Shtetit, në kuadër të operacionit u kap dhe u arrestua në banesën e tij në Shkodër shtetasi Bledar Cafi, 50 vjeç, lindur dhe banues në Shkodër, i cilësuar nga autoritetet si person me rrezikshmëri të lartë shoqërore.
Për Cafin, Gjykata e Posaçme e Shkallës së Parë për Korrupsionin dhe Krimin e Organizuar, më 25 shtator 2026, ka caktuar masën e sigurimit “Arrest në burg”. Ai dyshohet për veprat penale “Trafikim i lëndëve narkotike”, kryer në bashkëpunim, në formën e grupit të strukturuar kriminal, si dhe “Grup i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Operacioni u zhvillua nga Forcat Speciale RENEA, Drejtoria e Forcës së Posaçme Operacionale, Drejtoria për Hetimin e Narkotikëve, Drejtoria Vendore e Policisë Shkodër dhe BKH-ja, në zbatim të urdhrit të Prokurorisë së Posaçme dhe vendimit të gjykatës.
Në të njëjtën kohë, efektivët kanë ushtruar kontrolle në ambiente dhe banesa që i përkasin shtetasit Endrit Dokle, alias Indrit Dokle, 43 vjeç, lindur në Kukës dhe banues në Tiranë, i cili është shpallur në kërkim që prej vitit 2024.
Edhe për Doklen, GJKKO-ja ka caktuar masën e sigurimit “Arrest në burg” për veprat penale “Trafikim i lëndëve narkotike”, kryer në bashkëpunim, në formën e grupit të strukturuar kriminal, “Grup i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Sipas Policisë, gjatë kontrolleve Endrit Dokle nuk është gjetur në banesë. Për këtë arsye, strukturat policore vijojnë punën për lokalizimin dhe kapjen e tij.
Operacioni “Muri i Lartë” u zhvillua nën drejtimin e SPAK-ut, në kuadër të hetimeve për veprimtari të dyshuara kriminale të lidhura me trafikun e lëndëve narkotike dhe grupet e strukturuara kriminale.