Zbardhen identitetet e gjashtë viktimave të shpërthimit të fuqishëm që shkaktoi shembjen e një godine në lagjen historike të Plakës në Athinë. Mes viktimave janë edhe tre shqiptarë, të cilët sipas informacioneve të korrespondentit të Top Channel, Artur Bibe, kishin shtetësi shqiptare dhe amerikane dhe ndodheshin në Athinë për qëllime turistike.

Bëhet fjalë për motër e vëlla, Florin Hoxha dhe Florida Hoxha, si dhe Eris Cani, bashkëshortja e Florin Hoxhës.

Tre viktimat e tjera janë Ian Alexander Kirkpatrick, bashkëshorti i Florida Hoxhës, si dhe Edmond Hings dhe Athina Papapresku, pronarët e godinës ku ndodhi shpërthimi.

Deri tani, autoritetet greke kanë mundur të nxjerrin dy trupa nga rrënojat, ndërsa vijon operacioni i kërkim-shpëtimit për lokalizimin, identifikimin dhe nxjerrjen e viktimave të tjera.

Sipas autoriteteve greke, nuk ka të mbijetuar mes personave që ndodheshin në godinën e shembur.

Ngjarja e rëndë ndodhi një ditë më parë në zonën e Plakës, një prej lagjeve historike të Athinës. Një shpërthim i fuqishëm shkaktoi shembjen e godinës, duke zënë poshtë rrënojave gjashtë persona.

Autoritetet greke vijojnë hetimet për zbardhjen e rrethanave dhe shkaqeve të shpërthimit, ndërsa ekipet e emergjencës vazhdojnë punën në terren për nxjerrjen e trupave.