Maran dërgon në tribunë katër lojtarë

Trajneri i Kombëtares shqiptare, Rolando Maran, ka dërguar katër lojtarë në tribunë për sfidën ndaj Bjellorusisë.

Rregullorja e UEFA-s detyron çdo përfaqësuese të ketë vetëm 23 futbollistë të gatshëm në protokollin e ndeshjes.

Për këtë arsye, tekniku ka lënë jashtë listës Luis Hasën, Sabah Kerjotën, Feta Fetain dhe portierin Simon Simoni.

Mungesa e Luis Hasës përbën surprizën më të madhe të zgjedhjeve të Maran, duke marrë parasysh se mesfushori aktivizohet në Serie A.

Për rrjedhojë, mesfushori i Dinamos, në Superiore Klevi Qefalija është preferuar për të qenë në bankinë para Hasës dhe Fetait.

Këtyre katër emrave u shtohet edhe mbrojtësi Klisman Cake, i cili mungon për shkak dëmtimi. Për të njëjtën arsye jashtë janë edhe Qazim Laçi, Adrion Pajaziti e Ivan Balliu, të cilët ishin grumbulluar fillimisht në listën me 29 lojtarë.

Kjo përballje ndaj Bjellorusisë vlen për raundin e parë të Ligës së Kombeve, ku kuqezinjtë synojnë vendin e parë në Grupin 1 të Ligës C.