Qarku i Kukësit është përfshirë gjatë 24 orëve të fundit nga një rënie e ndjeshme e temperaturave, e shoqëruar me reshje shiu me intensitet të moderuar dhe reshje bore në zonat e larta malore.

Gjatë orëve të natës, reshjet kanë shkaktuar prani gurësh dhe dherash në disa akse rrugore. Në mëngjes, prezencë inertesh është konstatuar në rrugët e Shishtavecit, Valbonës, Qafës së Malit dhe Bushtricës.

Shërbimet e mirëmbajtjes kanë ndërhyrë në këto segmente, duke larguar gurët dhe dherat nga rruga dhe duke rikthyer normalitetin në qarkullim.

Sipas autoriteteve, aktualisht nuk raportohet për akse problematike dhe lëvizja e mjeteve vijon pa pengesa.

Ndërkohë, në bashkinë Tropojë, gjatë pasdites së djeshme, janë regjistruar reshje bore në zonat e larta malore. Reshjet kanë përfshirë kryesisht bjeshkët e Markofçës, ku vijojnë të qëndrojnë banorë në stane.

Autoritetet bëjnë me dije se reshjet e borës nuk kanë shkaktuar probleme, ndërsa trashësia e shtresës së krijuar ka qenë e vogël.

Ulja e temperaturave dhe reshjet e shiut e të borës kanë sjellë një atmosferë tipike vjeshtore në zonën e Kukësit, ndërsa shërbimet e mirëmbajtjes vijojnë monitorimin e akseve rrugore për të garantuar qarkullimin normal.