Athinë, 3 shqiptarë të zhdukur në rrënojat e ndërtesës pas shpërthimit

Florin Hoxha, Florida Hoxha dhe Eris Cani janë tre shqiptarët që rezultojnë të zhdukur nën rrënojat e ndërtesës së shembur pas shpërthimit të fuqishëm në zonën e Plakës, në Athinë. Florin Hoxha dhe Florida Hoxha janë motër e vëlla, ndërsa Eris Cani është bashkëshorti i kësaj të fundit.

Ata ndodhen mes personave që vijojnë të rezultojnë të zhdukur pas shpërthimit që tronditi mëngjesin e së premtes rrugën Lysikratous, në zemër të Athinës. Deri më tani, ekipet e kërkim-shpëtimit kanë nxjerrë dy trupa nga rrënojat.

Pas nxjerrjes së trupit të një gruaje në orët e para të mëngjesit, nga rrënojat u nxor edhe trupi i dytë. Sipas zëdhënëses së Departamentit të Zjarrfikësve, trupi i dytë i përket një burri 77-vjeçar me shtetësi britanike.

Operacioni për gjetjen e personave të tjerë vijon në mënyrë intensive. Në terren ndodhen rreth 30 zjarrfikës me gjashtë automjete, përfshirë dy mjete speciale të EMAK-ut, si dhe tre qen të kërkim-shpëtimit.

Shpëtuesit po përdorin edhe gjeofona për të identifikuar zëra të mundshëm nën rrënoja, ndërsa kamerat speciale po përdoren për të kontrolluar hapësirat e mbetura të ndërtesës së shembur.

Ndërkohë, autoritetet greke po hetojnë shkaqet e shpërthimit. Sipas të dhënave paraprake, dyshohet se ngjarja mund të jetë shkaktuar nga një rrjedhje e gazit natyror.