Ish-kreu i një prej fraksioneve të Bandës së Durrësit, kundërshtari i përbetuar i Lulzim Berishës, ishte dënuar me burgim të përjetshëm për krime të rënda, kryesisht vrasje të kundërshtarëve. Në 2020, ai u lirua me kusht nga Gjykata e Krujës. Më herët, gjyqtarja Enkelejda Hoxha, e cila më vonë edhe u dënua, kishte rrëzuar dënimin e përjetshëm për Doklen dhe e kishte dënuar përfundimisht me 25 vite, duke i ndezur edhe dritën jeshile për liri.
Por, teksa paraqitej në Shërbimin e Provës, Dokle shpejt do të rikthehej në botën e krimit. Ai nisi përplasjen e fortë me bosin e bixhozit Ervis Martinaj dhe mes tyre nisi një luftë e ashpër. Luftë që kulmoi me vrasjen e ish-policit Xhelal Reçi, xhaxhait të bashkëshortes së Dokles. Pas këtij momenti, ndaj njerëzve të Ervis Martinajt, që ishte po ashtu në përplasje me disa grupe të tjera, si klani i drejtuar nga Leonard Duka, vëllezërit Durim e Valter Bami etj.
Pas zhdukjes së Martinajt në 2022, dyshimet ranë edhe mbi Indrit Doklen dhe ai u mor në pyetje lidhur me çështjen. Dyshimet rreth tij u ngritën pasi i penduari i drejtësisë, Nuredin Dumani, akuzoi Martinajn se i kishte ofruar gjysmë milioni euro për ta ekzekutuar. Edhe pse i zhdukur pa gjurmë, ndaj Martinajt u ngritën akuzat “Sigurimi i kushteve dhe i mjeteve materiale për të kryer vrasje”, në dëm të shtetasit Indrit Dokle, kryer në bashkëpunim të posaçëm të grupit të strukturuar kriminal, “Grupi i strukturuar kriminal”, “Kryerja e veprave penale nga grupi i strukturuar kriminal dhe organizata kriminale”. Të njëjtat akuza u ngritën edhe ndaj Elvin Merlikës, i njohur si krahu i djathtë i Martinajt. Dokle, ndërkohë, sipas të dhënave, gjatë kësaj kohe krijoi lidhje të forta me bosë të krimit në Durrës dhe Fier.
Indrit Dokle është nën akuzë zyrtare në kuadër të aksionit “Revanshi” për “Sigurimin e kushteve dhe të mjeteve materiale për të kryer vrasje”, në dëm të shtetasit Arben Ndoka, kryer në bashkëpunim të veçantë, atë të grupit të strukturuar kriminal. Ndoka është ish-deputet i PS-së, po ashtu në kërkim. Dokle dyshohet se bashkëpunoi me Durim Bamin për këtë ngjarje.
Dokle akuzohet po ashtu edhe për veprën penale “Sigurimi i kushteve dhe i mjeteve materiale për të kryer vrasje”, në dëm të shtetasve Tori Xheçuka dhe Erigers Mihasi, kryer në bashkëpunim të veçantë, atë të grupit të strukturuar kriminal. Xheçuka ndodhet në kërkim dhe është një prej njerëzve të besuar të Martinajt, ndërsa Mihasi, po ashtu pjesë e grupit të Martinajt, u ekzekutua në një atentat mafioz në Unazën e Re bashkë me Armando Dumanin. Ka dyshime se Indrit Dokle, për disa kohë, u strehua në Dubai.