Te fundit

Sulm kamikaz në Pakistan, të paktën 12 të vrarë dhe 30 të plagosur

26 Shtator 2026, 18:00Bota TEMA
Sulm kamikaz në Pakistan, të paktën 12 të vrarë dhe 30

Të paktën 12 persona janë vrarë dhe rreth 30 të tjerë janë plagosur nga një sulm vetëvrasës në një pikë kontrolli policore në distriktin Dera Ismail Khan, në provincën Khyber Pakhtunkhëa të Pakistanit.


Sulmi ndodhi të shtunën pranë Aman Melas, në zonën Darazinda. Sipas autoriteteve lokale, një automjet i ngarkuar me eksplozivë u përplas me pikën e kontrollit, duke shkaktuar një shpërthim të fuqishëm. Raportohet gjithashtu se sulmit mund t’i kenë paraprirë të shtëna armësh nga persona të armatosur.


Shefi i policisë së zonës, Safdar Baloch, tha se shumica e viktimave ishin pjesëtarë të forcave të sigurisë dhe kalimtarë. Mes të vrarëve dhe të plagosurve janë policë, zyrtarë doganash dhe pjesëtarë të departamentit të pyjeve. Të paktën dy civilë janë gjithashtu mes të plagosurve.

Ekipet e shpëtimit nga stacioni Darazinda mbërritën në vendngjarje menjëherë pas shpërthimit dhe nisën operacionet e ndihmës. Të plagosurit u morën dhe u transportuan në spitalet e zonës për trajtim mjekësor.


Deri tani, asnjë grup nuk ka marrë zyrtarisht përgjegjësinë për sulmin. Autoritetet dhe burimet lokale kanë ngritur dyshime ndaj Tehrik-e-Taliban Pakistan (TTP), grupi militant që ka qenë përgjegjës për një numër sulmesh në veriperëndim të vendit. TTP është një organizatë e veçantë nga Talibanët që qeverisin Afganistanin, megjithëse të dyja palët konsiderohen të lidhura ngushtë.


Dera Ismail Khan ndodhet në një zonë strategjike pranë kufirit me provincat Balochistan dhe Punjab, si dhe afër rajonit të Uaziristanit të Jugut. Për shkak të qarkullimit të madh të mallrave, në pikat e kontrollit të kësaj zone vendosen së bashku forca policore, zyrtarë doganorë dhe institucione të tjera shtetërore.


Sulmi vjen në një periudhë tensioni të lartë mes Pakistanit dhe Afganistanit. Autoritetet pakistaneze kanë akuzuar vazhdimisht Talibanët afganë se lejojnë anëtarë të TTP-së të veprojnë nga territori afgan dhe të kryejnë sulme përtej kufirit. Qeveria afgane i ka mohuar këto akuza.

Përplasjet e fundit përgjatë kufirit kanë rritur më tej tensionet mes dy vendeve. Sipas qeverisë pakistaneze, luftimet e fundit kanë shkaktuar viktima edhe mes forcave talibane afgane, ndërsa Pakistani ka kryer sulme ndaj objektivave që i konsideron baza të grupeve të armatosura në Afganistan.

Zhvillimet e fundit kanë vënë në rrezik edhe përpjekjet diplomatike të ndërmjetësuara nga Kina, Turqia, Katari dhe Arabia Saudite, të cilat synojnë uljen e tensioneve dhe arritjen e një marrëveshjeje më të qëndrueshme mes Pakistanit dhe Afganistanit.

Lini një Përgjigje

Më të lexuarat

Blog Tema

Powered by Tomorrow.io