Trump hedh poshtë propozimin iranian për të hapur Hormuzin dhe për t’i dhënë fund luftimeve: Po humbasin shumë keq

Presidenti i SHBA-së, Donald Trump, tha të shtunën se kishte hedhur poshtë një propozim iranian për të rihapur Ngushticën e Hormuzit dhe për t’i dhënë fund luftimeve në Lindjen e Mesme.

Irani e ngriti iniciativën në Asamblenë e Përgjithshme të OKB-së në Nju Jork, duke thënë se ajo u ishte transmetuar amerikanëve nëpërmjet ndërmjetësve të Katarit dhe se mund të rihapte rrugën ujore strategjike dhe t’i jepte fund armiqësive në rajon brenda shtatë ditësh.

Por në komentet për gazetarët në Shtëpinë e Bardhë, Trump tha: “Unë e refuzoj propozimin e tyre. Unë e refuzova marrëveshjen e tyre. Ata duan të bëjnë një marrëveshje për të hapur menjëherë Ngushticën e Hormuzit sepse po humbasin shumë keq”, tha ai para se të nisej për në Tenesi.

“Po fitojmë jashtëzakonisht shumë. Ata duan të bëjnë një marrëveshje dhe mendoj se kjo është në rregull, edhe mua më pëlqen të bëj një marrëveshje. Ajo që duan të bëjnë është të hapin menjëherë Ngushticën e Hormuzit, sepse nuk kanë para që hyjnë, sepse i marrin paratë e tyre nga Ngushtica e Hormuzit”, tha Trump.

SHBA-të kanë vendosur një bllokadë ekonomike ndaj Iranit për të ushtruar presion mbi Teheranin që të heqë bllokadën e Hormuzit, e cila ka zvogëluar në mënyrë drastike transportin detar përmes ngushticës, edhe pse Trump përsëri deklaroi se SHBA-të kishin kontrollin e rrugës ujore.

Wall Street Journal raportoi për herë të parë se Trump e kishte hedhur poshtë propozimin iranian, duke cituar zyrtarë të paidentifikuar amerikanë.

Thuhej se Trump ishte skeptik se Irani do t’i përmbushte kërkesat e tij dhe i kishte thënë stafit të tij se e sheh të mundshme një fushatë të ripërtërirë bombardimesh pas zgjedhjeve të nëntorit për Kongresin në SHBA.

Një zyrtar amerikan kishte thënë më parë se diskutimet me Iranin përmes ndërmjetësve ishin “pozitive dhe konstruktive”.