Renditja e FIFA-s/ Kosova dhe Shqipëria fitojnë nga një pozicion

Kosova ka bërë një tjetër hap përpara në renditjen e FIFA-s pas fitores ndaj Irlandës. Dardanët kanë kaluar në vendin e 77-të në klasifikimin botëror, duke u ngjitur me një pozicion pas suksesit 1-0 në stadiumin “Fadil Vokrri”.

Kosova mori tre pikët ndaj Irlandës në një ndeshje ku, pavarësisht rezultatit minimal, pati një paraqitje dominuese në aspekte të ndryshme të lojës. Goli i Muriqit mjaftoi për t’i dhënë Kosovës fitoren dhe tre pikët, të cilat tashmë reflektohen edhe në renditjen e FIFA-s.

Pas këtij rezultati, Kosova ka kaluar Bolivinë dhe është pozicionuar në vendin e 77-të. Dardanët ndodhen tashmë një pozicion pas Austrisë dhe Izraelit, ndërsa ndryshimi në renditje mund të vazhdojë edhe pas ndeshjes së radhës.

Kundërshtari i ardhshëm është pikërisht Austria, një prej skuadrave të pozicionuara dukshëm më lart në klasifikimin botëror. Austria renditet në vendin e 23-të dhe përballja me Kosovën do të jetë një tjetër mundësi për Dardanët që të marrin pikë në renditjen e FIFA-s.

Në anën tjetër, edhe Shqipëria ka regjistruar një ngjitje në renditjen e FIFA-s. Kuqezinjtë tashmë renditen në vendin e 66-të në botë, pasi Hondurasi ka pësuar një humbje në shtëpi ndaj Surinamit.

Rezultati i Hondurasit ka ndikuar drejtpërdrejt në ndryshimin e pozicionit të Shqipërisë. Kuqezinjtë përfitojnë nga kjo lëvizje dhe ngjiten në klasifikimin botëror.

Kujtojmë se Kosova luan në Ligën B, në grup me Irlandën, Izraelin dhe Austrinë. Shqipëria në krahun tjetër është në Ligën C, në një grup me Bjellorusinë, Finlandën dhe San Marinon.

Synimi i kuqezinjve është të ngjiten një ligë më sipër, ndërsa dardanët duan të shmangin rënien më poshtë.