Presidenti rus Vladimir Putin dhe presidenti serb Aleksandar Vuçiç kanë zhvilluar një bisedë telefonike, gjatë së cilës kanë diskutuar zhvillimin e mëtejshëm të partneritetit strategjik mes Rusisë dhe Serbisë.
Sipas Kremlinit, në fokus të bisedës ishin bashkëpunimi në sektorët e energjisë, naftës dhe gazit, transportit dhe kujdesit shëndetësor.
Biseda zhvillohet në një moment kur Serbia përballet me pasiguri lidhur me furnizimin me energji nga Rusia. Marrëveshja aktuale për furnizimin me gaz rus skadon në fund të shtatorit, ndërsa licenca amerikane që lejon kompaninë serbe të naftës NIS, në pronësi ruse, të vijojë aktivitetin, skadon më 30 shtator.
Rusia mbetet furnizuesi kryesor i gazit për Serbinë, duke mbuluar më shumë se 80% të nevojave të vendit. Gazi rus mbërrin në Serbi përmes tubacionit TurkStream, përmes Turqisë dhe Bullgarisë.
Putin dhe Vuçiç diskutuan gjithashtu lidhjet e transportit. Serbia vijon të ketë fluturime direkte me Rusinë përmes kompanisë Air Serbia, pavarësisht kufizimeve të vendosura nga Bashkimi Evropian ndaj transportuesve rusë pas nisjes së luftës në Ukrainë.
Gjatë bisedës, Vuçiç falënderoi Rusinë për mbështetjen ndaj Serbisë dhe në veçanti për ndihmën në përballimin e zjarreve në pyje.
Sipas Kremlinit, presidenti serb e informoi Putinin edhe për përgatitjet për zgjedhjet e parakohshme parlamentare në Serbi, ndërsa të dy liderët theksuan, sipas deklaratës ruse, “papranueshmërinë e ndërhyrjeve të jashtme” në proceset zgjedhore.
Biseda përfshiu edhe çështjet ndërkombëtare, mes tyre konfliktin në Ukrainë dhe zhvillimet në Ballkan.
Në lidhje me situatën në Bosnje dhe Hercegovinë, Putin dhe Vuçiç theksuan rëndësinë e ruajtjes së kuadrit të Dejtonit dhe të drejtave dhe interesave të Republikës Srpska, sipas deklaratës së Kremlinit./Versus.al
