Stuhia e fuqishme godet SHBA-në, mbi 40 milionë njerëz përballen me reshje dhe përmbytje

Mbi 40 milionë njerëz përgjatë bregut verilindor të SHBA-së pritet të përballen me reshje të dendura, erëra të forta dhe përmbytje gjatë tre ditëve të ardhshme.

 Zonat nga New Jersey deri në Massachusetts pritet të jenë ndër më të prekurat, me rrezik për rrëzime pemësh, dëmtime të linjave elektrike dhe përmbytje bregdetare.

Mediat shkruajnë se kushtet e rënduara atmosferike kanë sjellë edhe anulime aktivitetesh, përfshirë koncerte dhe festivale në Boston, New York dhe Maryland.

Autoritetet amerikane kanë paralajmëruar gjithashtu për vonesa dhe anulime të mundshme të fluturimeve, ndërsa disa kompani ajrore u kanë ofruar pasagjerëve mundësinë për të ndryshuar fluturimet pa pagesë.