Duka, thirrje presidentit: Pasaportat e futbollistëve janë kthyer në një tragjedi më vete

Presidenti i Federatës Shqiptare të Futbollit, Armand Duka, foli përpara përballjes së Shqipërisë ndaj Bjellorusisë në Ligën e Kombeve.

Kreu i FSHF-së pranoi se kombëtarja nuk po kalon ditët e saj më të mira, por nënvizoi rëndësinë e rikthimit te rezultatet pozitive. Ai bëri me dije se në futbollin e sotëm nuk ka më përballje të lehta, ndaj kërkoi përqendrim maksimal nga lojtarët në fushë.

Veç aspektit sportiv, presidenti i federatës ngriti me shqetësim pengesat administrative për pajisjen e futbollistëve me pasaporta shqiptare. Ai e cilësoi procedurën e pajisjes me dokumente si një "tragjedi më vete" për shkak të burokracisë dhe mungesës së mbështetjes.

“Trajneri është pjesë e rëndësishme e skuadrës. Ne jemi munduar të bëjmë më të mirën me Maran, duke parë eksperiencën e tij dhe karakteristikat. Rezultatin nuk e bën vetëm trajneri. Bjellorusia e sotme nuk është si ajo atëherë. Nuk ka diferenca mes skuadrave. Të gjitha janë të vështira. Për hir të së vërtetës, Shqipëria nuk është në ditët e saj më të mira, por e rëndësishme është që të rikthehet te rezultatet pozitive. Të gjitha ndeshjet janë të vështira. Është shumë e vështirë sot. Uroj të ketë përqendrim maksimal nga çunat sot.

Jemi në një moment transformimi dhe uroj të kalojë me sa më pak kriza, për tu rikthyer te objektivat europianë. UEFA nuk gabon kurrë. Është një dritare shumë e mirë për të përgatitur ndeshjen.

Kemi futbollistë nga U-21 dhe nga U-19 që mund të bëjnë kapërcimin tek ekipi i parë.  Kemi nevojë edhe për shqiptarët e Shqipërisë, që kanë pasur problematika kur janë larguar. Ky proces nuk është i lehtë për ne. Nuk është se kemi ndonjë mbështetje. Një tragjedi më vete për të bërë pasaportat e futbollistëve shqiptarë. Nuk e di çfarë bëjnë.

Shpresoj ta kemi edhe kabinetin e presidentit mbështetje dhe të bëjë më shumë për ekipin kombëtar, në lidhje me pasaportat”, deklaroi Duka për Tv Klan.