TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Çfarë e shkaktoi shpërthimin vdekjeprurës në Athinë të Greqisë? Kjo është pyetja që mbetet ende e hapur, pasi ka përfunduar operacioni për nxjerrjen e gjashtë trupave të pajetë nga rrënojat e ndërtesës në zonën e Plakës, pranë Akropolit.
Nga tragjedia humbën jetën gjashtë persona. Mes viktimave janë shtetas shqiptarë me origjinë shqiptare dhe shtetësi amerikane, ndër ta Florida Hoxha dhe bashkëshorti i saj Ian Alexander Kirkpatrick, i cili ishte martuar së fundmi, si dhe Eris Cani dhe bashkëshorti i saj, Florin Hoxha.
Sipas informacioneve të bëra publike, dy çiftet shqiptaro-amerikane kishin udhëtuar së bashku në Athinë. Florida Hoxha dhe Ian Alexander Kirkpatrick ishin martuar së fundmi dhe ndodheshin në Greqi për muajin e mjaltit, ndërsa Eris Cani dhe Florin Hoxha raportohet se ishin në pritje të një fëmije.
Dy viktimat e tjera ishin një çift i moshuar që banonte në katin e dytë të ndërtesës.
Dyshimet për rrjedhje gazi
Që në orët e para pas shpërthimit, skenari kryesor që po shqyrtohet nga autoritetet është ai i një rrjedhjeje gazi natyror. Dyshohet se gazi mund të jetë grumbulluar në një hapësirë të mbyllur dhe më pas të jetë ndezur, duke shkaktuar shpërthimin e fuqishëm.
Vëmendja e autoriteteve është përqendruar veçanërisht te kati i dytë i ndërtesës, ku raportohet se kishte një lidhje me rrjetin e gazit natyror, që përdorej për kuzhinën dhe oxhakun.
Megjithatë, deri më tani nuk ka një konfirmim zyrtar se instalimi i gazit ka qenë shkaku i shpërthimit.
Një element tjetër që po shqyrtohet është fakti se apartamenti në katin e parë, ku qëndronin katër shtetasit amerikanë, nuk kishte lidhje me gaz natyror dhe nuk përdorte bombola propani apo burime të tjera gazi.
Ekspertët po analizojnë rrënojat për të përcaktuar se nga cili ambient mund të ketë nisur shpërthimi dhe nëse ka pasur një problem në instalimet e gazit apo në ndonjë pajisje tjetër.
Shërbimi i Zjarrfikësve: “Nuk pati asnjë ankesë për erë gazi”
Një tjetër pikë që po hetohet është nëse ka pasur shenja paralajmëruese përpara shpërthimit.
Departamenti i Zjarrfikësve ka deklaruar se, para ngjarjes, nuk ishte bërë asnjë ankesë për erë gazi.
Ndërkohë, dëshmi të tjera të raportuara nga mediat greke kanë ngritur pretendimin se disa persona mund të kenë ndier erë të fortë gazi përpara shpërthimit.
Nëse konfirmohet se ka pasur rrjedhje gazi, ekspertët do të duhet të përcaktojnë se nga cili instalim ka ardhur ajo dhe përse nuk është konstatuar më herët.
Shpërthimi pranë Akropolit
Shpërthimi ndodhi mëngjesin e 25 shtatorit, rreth orës 07:35, në rrugën Lysikratous, në zonën historike të Plakës, pranë Akropolit.
Forca e shpërthimit shkaktoi shembjen e ndërtesës dykatëshe dhe dëmtime edhe në objektet përreth.
Në vendngjarje u angazhuan dhjetëra zjarrfikës, ekipe të specializuara të kërkim-shpëtimit dhe qen të trajnuar për kërkimin e personave nën rrënoja.
Ekipet përdorën kamera termike dhe pajisje të posaçme për të identifikuar shenja jete nën rrënoja. Operacioni i kërkim-shpëtimit vijoi për më shumë se 24 orë, deri në nxjerrjen e trupave të të gjashtë viktimave.
Fillimisht, autoritetet kishin raportuar gjashtë persona të zhdukur. Gjatë kërkimeve u gjetën edhe sende personale dhe dokumente që ndihmuan në identifikimin e personave që ndodheshin në ndërtesë.
Hetimet vijojnë
Megjithëse rrjedhja e gazit natyror mbetet një nga skenarët kryesorë që po hetohet, shkaku përfundimtar i shpërthimit nuk është konfirmuar ende zyrtarisht.
Autoritetet po shqyrtojnë gjendjen e instalimeve të ndërtesës, mundësinë e një rrjedhjeje nga rrjeti i gazit, pajisjet që ndodheshin në ambientet e objektit, si dhe çdo provë tjetër që mund të ndihmojë në zbardhjen e ngjarjes.
Deri në përfundimin e ekspertizës teknike, mbetet e hapur pyetja se çfarë e shkaktoi shpërthimin që solli shembjen e ndërtesës dhe humbjen e gjashtë jetëve në zemër të Athinës.
