New York-u është kthyer këto ditë në qendrën e diplomacisë botërore, me presidentë, kryeministra dhe delegacione nga e gjithë bota që zhvillojnë takime dypalëshe në kuadër të Asamblesë së Përgjithshme të OKB-së.
Në këtë skenë ishte edhe Edi Rama, i cili më 25 shtator mbajti fjalimin e tij në OKB. Por, përtej fjalimit, në axhendën e bërë publike nuk spikat ndonjë takim i nivelit të lartë me administratën amerikane apo me liderë të tjerë ndërkombëtarë.
Kryeministria flet për “një sërë takimesh dhe aktivitetesh”, ndërsa aktivitetet e bëra publike mbeten kryesisht të lidhura me evente dhe diasporën.
Dhe pikërisht te shqiptarët e Amerikës u rikthye Rama këtë të shtunë.
Në një New York të mbushur me liderë botërorë dhe takime diplomatike, axhenda publike e Ramës duket më e “thatë” në bilaterale, ndërsa vëmendja përfundoi sërish te diaspora, protestuesit dhe… vezët.
“Po krijojmë një regjistër kombëtar të diasporës si një dritare për ata që duan të investojnë sadopak në Shqipëri. Organicitet ishin edhe vezët që më hodhën mua para pak netësh, duke treguar se ajo çka ndodh në Shqipëri i ka integruar shqiptarët. Një nga hedhësit e vezëve kishte ardhur nga Britania për të hedhur vezë. Shpresoj të ketë kaluar mirë me policinë e New Yorkut.
Pastaj në trupën e angazhuar kryesor ishte një shqiptar që punonte këtu. Falë kësaj ndërlidhjeje mes Shqipërisë dhe diasporës, u ndodha fiks si në Shqipëri, me protesta dhe me plot shqiptarë. U prita me një tortë rozë me dy flamingo sipër dhe u ndjeva shumë mirë.
“Nuk vuajmë më faktin që kafshët e natyra vriten dhe nuk merret më njeri me të, por kafshët dhe natyra mbrohen dhe njerëzit shqetësohen. Ka ardhur koha kur Shqipëria thotë se ka edhe më mirë dhe është e vërtetë që ne së bashku mund të bëjmë çdo ditë e më mirë për Shqipërinë dhe shqiptarët. Kur pa që m’u hodhën ca vezë, erdhi me vrap kryepolici i Shqipërisë, Pjerin Ndreu. Një nga kryetarët më të mirë të bashkive, që vuan edhe nga fakti që Lezha nuk bëhet kryeqytet, më la porosi të them diçka për lezhjanët sepse ka të tillë në sallë. Jeni me fat që e keni”, tha Rama.
