Kosova rikthehet sonte në fushë për Ligën e Kombeve, teksa në Vjenë do të përballet me Austrinë në një sfidë të rëndësishme për Dardanët.
Pas triumfit 1-0 ndaj Irlandës, ekipi i Franco Fodës kërkon ta vazhdojë serinë pozitive edhe në udhëtim. Austria, nga ana tjetër, e ka nisur këtë edicion gjithashtu me fitore.
Të lidhura
None found
Ndeshja do të luhet në Ernst-Happel-Stadion dhe do të përballë dy përfaqësuese me synime të qarta. Në stolin e tyre do të jenë Franco Foda dhe Ralf Rangnick, mes të cilëve ka edhe një histori të veçantë.
Telegrafi do të përcjellë zhvillimet nga Vjena, prej atmosferës dhe formacioneve te ngjarjet para e gjatë takimit, si dhe deklaratat e analizat pas përfundimit të tij.
Në kryeqytetin austriak janë gazetari Shkumbin Pireva dhe kameramani Koran Basha, të cilët do të sjellin raportime, intervista dhe pamje nga ndeshja.
27/09/2026 01:54 – Tifozët kosovarë ndezin atmosferën e natës në Vjenë
Rrugët e Vjenës janë mbushur gjatë natës nga tifozët e Kosovës, të cilët kanë krijuar atmosferë festive me brohoritje e këngë.
Dardanët kanë valëvitur flamuj dhe kënduar këngë patriotike, duke sjellë ngjyrat e Kosovës në kryeqytetin austriak. Pamjet tregojnë atmosferën e krijuar.
27/09/2026 01:51 – Austria ka 55 pozita më shumë se Kosova në renditjen e FIFA-s
Në klasifikimin botëror të FIFA-s, Austria mban vendin e 23-të, kurse Kosova renditet e 78-ta. Diferenca mes dy ekipeve është 55 vende.
Takimi i sontëm në Vjenë u jep Dardanëve mundësinë të vazhdojnë rezultatet pozitive.
27/09/2026 01:50 – Rezultatet e dhjetë ndeshjeve të fundit
Të dyja skuadrat vijnë në këtë takim pasi fituan ndeshjet e para të tyre në Ligën e Kombeve.
Në dhjetë paraqitjet e fundit, Austria ka regjistruar gjashtë fitore, dy barazime dhe dy humbje. Të njëjtat shifra i ka edhe Kosova.
Në ndeshjet e fundit, Austria fitoi 3-1 ndaj Izraelit, ndërsa Kosova mundi Irlandën 1-0.
27/09/2026 01:49 – Vlera e skuadrave: Austri dhe Kosovë
Austriakët dhe kosovarët luajnë sonte në Vjenë nga ora 18:00. Një prej dallimeve mes tyre vërehet edhe te vlera e ekipeve.
Transfermarkt e vlerëson skuadrën e Austrisë me 245.20 milionë euro, ndërsa atë të Kosovës me 147.80 milionë euro.
Konrad Laimer, me vlerë prej 32 milionë eurosh, është lojtari më i shtrenjtë i Austrisë. Në përfaqësuesen e Kosovës, Fisnik Asllani kryeson me 35 milionë euro.
27/09/2026 01:45 – Njihen prej 30 vitesh, por për herë të parë do të jenë rivalë në stolin e skuadrave
Takimi Austri–Kosovë nuk është vetëm një duel mes dy kombëtareve që synojnë fitoren e radhës në Ligën e Kombeve. Përzgjedhësit Franco Foda dhe Ralf Rangnick kanë një njohje që zgjat rreth tri dekada, por për herë të parë do të përballen si kundërshtarë.
Dy trajnerët janë njohur në vitet ’90, kur të dy ishin të angazhuar në futbollin gjerman.
Foda ishte futbollist i Stuttgartit dhe po rikuperohej nga një dëmtim, ndërsa Rangnick merrej me procesin e rehabilitimit pranë klubit.
27/09/2026 01:44 – Nga Bundesliga austriake te Kosova: Foda ka tre lojtarë që e njohin kampionatin e vendit
Në ndeshjen e së dielës në Vjenë, ku Kosova luan me Austrinë në Ligën e Kombeve, Franco Foda ka përfshirë në listë tre futbollistë që aktualisht aktivizohen në kampionatin austriak.
Dion Kacuri i Austria Lustenau, Valmir Matoshi i Sturm Grazit dhe Vesel Demaku i SCR Altach mund t’i japin trajnerit njohuri shtesë për futbollin austriak dhe kundërshtarin e Kosovës.
27/09/2026 01:42 – Vojvoda: Austria ka përvojë, por do të ketë shumë tifozë shqiptarë; foli edhe për Alaban
Mërgim Vojvoda ka thënë se Kosova është e gatshme ta tregojë cilësinë e saj përballë Austrisë.
Futbollisti i Udineses pranoi në konferencën për shtyp se Austria është favorite, por beson se Dardanët mund të synojnë pikët e plota.
“Gjendja është e mirë. I gjithë ekipi është në dispozicion dhe presim që të jemi gati për ndeshjen e nesërme”.
27/09/2026 01:41 – Foda i drejtohet Austrisë: Jeni favoritë, por stadiumi do të mbushet me tifozë kosovarë
Franco Foda pranoi se Austria është favorite për ndeshjen e nesërme, ndërsa shtoi se Kosova i ka përmbushur të gjitha detyrat e saj.
Përzgjedhësi gjerman pret shumë tifozë kosovarë në tribuna dhe shprehu bindjen se ekipi i tij do të zhvillojë paraqitje të shkëlqyer.
Gjatë konferencës për media, Foda i rikujtoi Austrisë edhe paraqitjet e fundit të Kosovës në ndeshjet si mysafire.
27/09/2026 01:41 – Futbollistët e Kosovës panë nga afër fushën e Ernst-Happel-Stadionit
Pak orë para sfidës me Austrinë, lojtarët e Kosovës dolën në fushën e “Ernst Happel Stadionit” për të vlerësuar terrenin.
Dardanët nuk mbajtën seancë stërvitore. Në ditën e ndeshjes si mysafirë, ata zakonisht bëjnë një vizitë të shkurtër në fushë në vend të stërvitjes.
27/09/2026 01:39 – Rangnick: Kosova është më e vështirë se Izraeli dhe mund të fitonte më thellë ndaj Irlandës
Përzgjedhësi i Austrisë, Ralf Rangnick, pret që përballja me Kosovën të jetë më e vështirë se ajo me Izraelin.
Austria e nisi edicionin e Ligës së Kombeve me fitore 3-1 ndaj Izraelit, pasi shënoi dy gola në minutat e fundit.
Duke folur për mediat austriake, Rangnick parashikoi një sfidë më të vështirë kundër Kosovës dhe vlerësoi mënyrën se si luajnë taktikisht Dardanët.
27/09/2026 01:36 – Kosova ngjitet një vend në renditjen e FIFA-s
Pas fitores ndaj Irlandës, përfaqësuesja e Kosovës është ngritur me një pozitë në renditjen e FIFA-s.
Dardanët fituan tri pikë të rëndësishme në “Fadil Vokrri”, duke mposhtur Irlandën. Kosova e kontrolloi ndeshjen në të gjitha aspektet, edhe pse rezultati përfundimtar ishte 1-0.
27/09/2026 01:36 – Masa të forta sigurie për Austri–Kosovë
Të dielën, para ndeshjes së Ligës së Kombeve mes Austrisë dhe Kosovës në “Ernst Happel”, në Vjenë do të zbatohen masa të shtuara sigurie.
Mediumi austriak 5 Minuten raporton se Drejtoria e Policisë së Vjenës ka caktuar një perimetër të gjerë sigurie përreth stadiumit. Ai do të jetë në fuqi nga ora 10:00 deri në 22:00.
Tifozët do t’i nënshtrohen kontrolleve të rrepta dhe autoritetet u kanë kërkuar të llogarisin kohë shtesë për të hyrë në stadium.
27/09/2026 01:35 – Vesel Demaku u rrit në Austri, por zgjodhi Kosovën: Arsyet e vendimit të tij
Vesel Demaku ka lindur dhe është rritur në Austri. Kur iu desh të vendoste se cilën kombëtare do të përfaqësonte, mesfushori la mënjanë mundësinë për të luajtur për Austrinë dhe zgjodhi Kosovën.
Në një intervistë për mediumin austriak Der Standard, Demaku foli me hollësi për rëndësinë e këtij vendimi. Ai theksoi se zgjedhja lidhej jo vetëm me futbollin, por edhe me historinë familjare dhe identitetin e tij.
“Absolutisht. Mendoj se pasi të kesh qenë atje dhe të kesh njohur njerëzit – është shumë më tepër se kaq. Jam bërë edhe më i vetëdijshëm për këtë që kur luajta ndeshjet e mia të para ndërkombëtare. Është shumë më tepër sesa thjesht sport”, ka thënë Demaku për lidhjen e tij me Kosovën.
27/09/2026 01:34 – Shqetësim në kampin austriak: një prej yjeve mund të mungojë ndaj Kosovës
Austria mund të luajë të dielën pa një nga futbollistët që kishte mbajtur shiritin e kapitenit në ndeshjen e fundit.
Michael Gregoritsch nuk ka pësuar dëmtim të rëndë në takimin me Izraelin, por aktivizimi i tij kundër Dardanëve mbetet i pasigurt. Ndeshja luhet në Vjenë të dielën nga ora 18:00.
Sulmuesi u dëmtua në nyjën e këmbës gjatë fitores 3-1 ndaj Izraelit në Linz dhe doli nga loja në pjesën e parë. Në vend të tij hyri Sasha Kalajdzic.
Federata Austriake e Futbollit i tha agjencisë së lajmeve APA se lëndimi nuk është serioz. Të premten, Gregoritsch iu nënshtrua edhe rezonancës magnetike për të kontrolluar gjendjen.
27/09/2026 01:30 – Rangnick shpreh vlerësim të madh për Fodën
Pas fitores 3-1 kundër Izraelit, Austria ka siguruar një nisje të suksesshme në Ligën e Kombeve, por trajneri Ralf Rangnick kërkon që skuadra të vazhdojë me fitore.
Përzgjedhësi austriak tashmë është përqendruar te Kosova dhe takimi i së dielës në Vjenë.
“Duam që fitores ndaj Izraelit t’ia bashkojmë edhe fitoren ndaj Kosovës”, ka deklaruar Rangnick.
27/09/2026 01:30 – Krasniqi para sfidës me Austrinë: Pse të mos fitojmë edhe atje?
Pas fitores 1-0 ndaj Irlandës, sulmuesi i Kosovës Ermal Krasniqi foli për faqen zyrtare të FFK-së. Ai vlerësoi paraqitjen e Dardanëve dhe komentoi ndeshjen e radhës me Austrinë.
Sipas Krasniqit, Kosova e pati të vështirë të shënonte në pjesën e parë, kur Irlanda ishte e tërhequr në mbrojtje. Megjithatë, ai tha se skuadra krijoi raste dhe e meritoi fitoren.
27/09/2026 01:30 – Rashica pas suksesit ndaj Irlandës: Kërkojmë tri pikët edhe në Austri
Milot Rashica foli për faqen zyrtare të Federatës së Futbollit të Kosovës (FFK) pas triumfit 1-0 ndaj Irlandës në ndeshjen hapëse të Ligës së Kombeve.
Ai e cilësoi shumë të rëndësishme nisjen e kampanjës me fitore, sidomos pasi takimi i parë u zhvillua në shtëpi.
27/09/2026 01:18 – Foda i dha debutimin, ndërsa tani ylli austriak do ta ketë përballë: Ribashkim i veçantë
Për Nicolas Seiwaldin, sfida e së dielës nuk është një ndeshje e zakonshme e Austrisë në Ligën e Kombeve. Në bankinën kundërshtare do të jetë trajneri që pati ndikim të rëndësishëm në fillimet e tij me kombëtaren austriake.
Bëhet fjalë për Franco Fodën, ish-përzgjedhësin e Austrisë dhe trajnerin aktual të Kosovës. Seiwald debutoi me përfaqësuesen austriake nën drejtimin e tij rreth pesë vjet më parë.
27/09/2026 01:17 – Kosova i nisi përgatitjet për Austrinë tri ditë më parë
Më 25 shtator, Dardanët zhvilluan stërvitjen e parë për ndeshjen me Austrinë. Në atë seancë, Franco Foda kishte në dispozicion 16 futbollistë.
Ndërkohë, 11 lojtarët që nisën nga minuta e parë kundër Irlandës kryen në hotel një seancë rigjeneruese.
27/09/2026 01:17 – Austria dhe Kosova takohen për herë të parë
Përfaqësueset A të Kosovës dhe Austrisë nuk kanë luajtur më parë kundër njëra-tjetrës. Për këtë arsye, ndeshja e sontme në Vjenë shënon përballjen e parë mes tyre.
Takimi nis në orën 18:00 në Ernst-Happel-Stadion. Ndeshja e kthimit është caktuar për 4 tetor në Prishtinë.
27/09/2026 01:17 – Të dyja përfaqësueset vijnë pas fitoreve
Kosova e pret duelin me Austrinë pas fitores 1-0 ndaj Irlandës, vendosur nga goli i Vedat Muriqit në minutën e 83-të.
Austria, ndërkaq, e nisi Ligën e Kombeve me suksesin 3-1 ndaj Izraelit. Për të shënuan Romano Schmid (43’), Phillipp Mwene (90’) dhe Saša Kalajdžić (90+3’).
27/09/2026 01:17 – Ndeshja luhet në Ernst-Happel-Stadion nga ora 18:00
Austri–Kosovë zhvillohet sonte në orën 18:00 në Ernst-Happel-Stadion të Vjenës, impianti më i madh sportiv në Austri.
Stadiumi ka rreth 50 mijë ulëse dhe pritet të jetë i mbushur për këtë takim të Ligës së Kombeve.
Ernst-Happel-Stadion është ndër stadiumet më të njohura të futbollit austriak. Gjatë viteve ka pritur shumë ndeshje të rëndësishme ndërkombëtare, mes tyre edhe finalen e Euro 2008.
