Pas gjashtë ditësh në Shtetet e Bashkuara të Amerikës, kryeministri Edi Rama pritet t’u drejtohet sot shqiptarëve me një mesazh nga salla e shtypit në Aeroportin Ndërkombëtar “Nënë Tereza”.
Rama ndodhej në SHBA për të marrë pjesë në punimet e sesionit të 81-të të Asamblesë së Përgjithshme të Kombeve të Bashkuara në Nju Jork. Mesazhi i tij vjen ndërkohë që në Shqipëri janë zhvilluar një sërë zhvillimesh, mes tyre edhe hetimet e SPAK ndaj ish-drejtoreshës së Shërbimit Informativ Shtetëror, Vlora Hyseni.
Hyseni dyshohet se i ka dorëzuar informacione sekrete biznesmenit Ergys Agasi, i cili është arrestuar në kuadër të dosjes “AKSHI”. Pas nisjes së hetimeve, Rama reagoi nga Nju Jorku dhe njoftoi lirimin e Hysenit nga detyra.
Në atë moment, kryeministri deklaroi se pas kthimit nga SHBA-ja, në konsultim me Presidentin Bajram Begaj, do të zgjidhej drejtuesi i ri i Shërbimit Informativ të Shtetit.
Përveç zhvillimeve në vend, pjesë e mesazhit pritet të jetë edhe vizita e Ramës në SHBA dhe takimet e zhvilluara gjatë qëndrimit atje.
Axhenda e kryeministrit nisi me një takim me komunitetin shqiptar në Michigan, ku ai njoftoi planin për hapjen e një konsullate shqiptare, si dhe krijimin e Regjistrit Kombëtar të Diasporës.
Më pas, në Nju Jork, Rama zhvilloi aktivitete të tjera me komunitetin shqiptaro-amerikan. Në fjalimin e mbajtur në Asamblenë e Përgjithshme të OKB-së, ai foli për inteligjencën artificiale, integrimin europian dhe rolin e Shqipërisë në skenën ndërkombëtare.
Mesazhi nga aeroporti pritet të sjellë qëndrimin e kryeministrit mbi zhvillimet e fundit në vend, si edhe një bilanc të vizitës së tij në Shtetet e Bashkuara.