Federata e Futbollit e Kosovës ka lëshuar një njoftim zyrtar në lidhje me gjendjen e mbrojtësit Albian Hajdari, duke bërë të ditur se ai nuk do të jetë i gatshëm për përballjen e sotme kundër Austrisë.
Të lidhura
None found
Lëndimi i Hajdarit ndodhi gjatë ndeshjes së fundit të Kosovës përballë Irlandës. Edhe pse stafi mjekësor u angazhua maksimalisht dhe punoi intensivisht në ditët në vijim për ta rikuperuar lojtarin në kohë, koha e mbetur deri te sfida në Vjenë rezultoi e pamjaftueshme për ta bërë atë të aftë për lojë.
Sipas njoftimit të FFK-së, vetë Hajdari kishte shfaqur një vullnet të fortë për të zbritur në fushë dhe për të kontribuar për ekipin në këtë takim kyç, por pas kontrolleve mjekësore u arrit në përfundimin se aktivizimi i tij nuk ishte i mundur.
Mbrojtësi do të mbetet nën kujdesin e ekipit mjekësor të Kombëtares, me prioritet rikuperimin e plotë të gjendjes së tij fizike.
Për shkak të mungesës së tij, formacioni i Kosovës pritet të pësojë një ndryshim në qendër të mbrojtjes.
Ron Raçi parashikohet ta zëvendësojë atë në këtë pozicion, duke u rreshtuar krahas Lumbardh Dellovës dhe Ilir Krasniqit në repartin e prapavijës.
