Tifozët e Zvicrës kanë shprehur mbështetjen e tyre për kapitenin Granit Xhaka gjatë ndeshjes kundër Maqedonisë së Veriut, duke brohoritur vazhdimisht emrin e tij dhe duke shpalosur një banderolë me mesazhin “Liri për Xhakën”.
Zvicra fitoi 0-3 ndaj Maqedonisë së Veriut të premten, por kombëtarja zvicerane do të duhet të luajë të paktën edhe tre ndeshjet e ardhshme në Ligën e Kombeve pa Xhakën.
Kapiteni është aktualisht nën hetim nga prokuroria në Zvicër lidhur me një vërtetim vaksinimi kundër COVID-19. Xhaka akuzohet se ka marrë një certifikatë vaksinimi pa u vaksinuar, pretendim të cilin ai e ka pranuar dhe për të cilin ka kërkuar falje.
Nga ana tjetër, mjekja e ndaluar në lidhje me çështjen i ka mohuar këto pretendime, duke deklaruar se e ka vaksinuar personalisht Xhakën dhe se dokumenti është origjinal.
Në pritje të zbardhjes së plotë të ngjarjes, Xhaka dhe përfaqësuesit e Federatës Zvicerane vendosën që futbollisti të mos grumbullohej për këto ndeshje, me qëllim shmangien e shpërqendrimeve rreth ekipit.
Megjithatë, mungesa e tij u ndje gjatë ndeshjes në Shkup. Sipas gazetës zvicerane “Blick”, emri i Xhakës u dëgjua vazhdimisht në tribunat e stadiumit, ndërsa tifozët shfaqën edhe banderolën “Liri për Xhakën”.
Mbështetja për kapitenin erdhi edhe nga bashkëlojtarët. Remo Freuler u shpreh se nuk kishte nevojë të flitej gjatë për Xhakën, duke e cilësuar atë si të pazëvendësueshëm dhe duke shpresuar që ai të rikthehet shpejt dhe situata të zgjidhet.