Rama: Hetimi i Vlora Hysenit i takon drejtësisë, mbrojtja e SHISH përgjegjësi e shtetit

Kryeministri Edi Rama deklaroi se hetimi dhe gjykimi i Vlora Hysenit i takojnë ekskluzivisht drejtësisë, ndërsa mbrojtja e SHISH nga çdo pasojë e mundshme është përgjegjësi e shtetit.

Në një mesazh nga Rinasi, Rama kërkoi që çështja të trajtohet në Këshillin e Sigurimit Kombëtar, të thirrur nga Presidenti.

“Hetimi dhe gjykimi i Vlora Hysenit është detyrë ekskluzive e drejtësisë, kjo nuk ka diskutim. Mbrojtja e SHISH nga çdo dëm kolateral të mundshëm është detyrë e gjithë shtetit”, u shpreh Rama.

Kryeministri theksoi se ndarja e pushteteve nuk duhet të nënkuptojë ndarje nga përgjegjësia shtetërore, duke e cilësuar Këshillin e Sigurimit si forum për diskutimin e garancive që duhet të mbrojnë institucionet.

“Ka ardhur koha ta trajtojmë bashkërisht dhe seriozisht. Këshilli i Sigurimit, thirrur njëherësh nga Presidenti, është vendi i duhur për të reflektuar dhe diskutuar mbi garancitë që duhet t’i mbrojnë institucionet tona, kur drejtuesit apo punonjësit rrëshqasin nga binarët dhe bëhen subjekt i një hetimi penal”, deklaroi Rama.