Duke folur nga Rinasi për hetimin ndaj ish-kreut të SHISH, Vlora Hyseni, kryeministri Edi Rama, deklaroi se përgjegjësia përballë drejtësisë është individuale dhe se çështja e saj duhet të trajtohet si një përballje personale me organet e drejtësisë.
“Prokuroria ka detyrën të hetojë, gjykata të gjykojë dhe media të zbulojë, të informojë e të kërkojë llogari, por askush nuk ka të drejtë ta shpallë tjetrin fajtor përpara gjykimit dhe jo më pas ta dehumanizojë botërisht. Kur një zyrtar i lartë i ka hapur vetes një llogari me drejtësinë, është një çështje individuale me drejtësinë. Nuk kam çfarë të shtoj tjetër rreth kësaj teme në vetvete”, deklaroi ai.
Sipas tij fakti që institucionet e drejtësisë hetojnë persona që mbajnë poste të larta nuk mund të merret si provë se korrupsioni është përhapur në qeveri apo se ai është shtuar.
“Mbi kuptimin politik të këtij zhvillimi, u ngrit një aktakuzë kundër qeverisë, me referencën ‘na mbyti korrupsioni’. Të dashur zgjedhës, pavarësisht bindjeve dhe kahjes së votës, fakti që drejtësia prek edhe njerëz me funksione të larta nuk provon kurrsesi se na mbyti korrupsioni apo se ai po shtohet. Përkundrazi, fakti që hetimet e pavarura prekin individë të veshur me pushtet nuk provon se shumica qeverisëse është e korruptuar. Përkundrazi, ne jemi të angazhuar deri në fund për reformat dhe masat antikorrupsion, si dhe për mbështetjen e organeve të pavarura të drejtësisë”, tha Rama. (A2 Televizion)
A2 CNN Livestream
MUND TE LEXONI GJITHASHTU
