Charles Spencer, vëllai i Princeshë Dianës, ka bërë një sërë zbulimesh të reja në librin e tij të kujtimeve, duke rrëfyer se motra e tij planifikonte të niste një jetë të re në Afrikën e Jugut me të dashurin e saj, kirurgun pakistanez Hasnat Khan.
Princeshë Diana po mendonte seriozisht të largohej nga Britania dhe të vendosej në Afrikën e Jugut me të dashurin e saj, mjekun Hasnat Khan, vetëm pak muaj para vdekjes tragjike.
Kështu pretendon vëllai i saj, Charles Spencer, në librin e ri “Swan Song: Diana, My Sister”, ku rrëfen disa prej episodeve më private të jetës së princeshës.
Sipas Spencer, Diana kishte shpresuar që Khan të gjente një vend pune në Cape Town dhe që të dy të ndërtonin atje një jetë larg presionit të familjes mbretërore dhe medias.
Madje, ajo kishte kontaktuar mjekun e njohur Christian Barnard, me shpresën se ai mund ta ndihmonte Khanin të gjente një pozicion në Groote Schuur Hospital, spitali ku Barnard kishte kryer transplantin e parë të suksesshëm të zemrës tek një njeri.
“Diana ëndërronte që ajo dhe i dashuri i saj të jetonin të lumtur — normalisht — aty pranë. Ana tjetër e botës dukej se ofronte mundësinë e një strehe”, shkruan Spencer.
Diana dhe Hasnat Khan u takuan për herë të parë në vitin 1995, kur princesha vizitoi një mik në Royal Brompton Hospital, ku Khan punonte si kirurg. Sipas rrëfimit të Spencer, Diana u kthye në spital pothuajse çdo ditë për tre javë dhe më vonë mes tyre nisi një lidhje e fshehtë.
Khan ishte një nga lidhjet më të rëndësishme të Dianës pas ndarjes nga atëherë Princi Charles në vitin 1992.
Çifti u përpoq ta mbante romancën larg vëmendjes së publikut. Në një rast, Diana veshi një paruke të zezë për të hyrë pa u njohur në klubin e famshëm të xhazit Ronnie Scott’s në Soho. Në një tjetër rast, Khan u fsheh në bagazhin e një makine për të hyrë në Kensington Palace dhe për të takuar Dianën.
Sipas Spencer, Diana kishte shkuar aq larg sa kishte kërkuar nga shërbëtori i saj, Paul Burrell, të gjente një prift që mund t'i martonte me Khanin, i cili është mysliman. Mjeku, megjithatë, më vonë e cilësoi këtë si një “ide qesharake”.
Diana madje vizitoi familjen e Khanit në Pakistan dhe e prezantoi atë me djemtë e saj, William dhe Harry.
Pse u nda çifti?
Në një hetim për vdekjen e Dianës në vitin 2008, Khan deklaroi se kishte frikë se martesa me gruan më të famshme në botë do të ishte tepër e vështirë për të.
“E dija se nuk do të mund të jetoja një jetë normale”, kishte thënë ai. Sipas Khanit, të dy kishin menduar edhe për mundësinë e zhvendosjes në Pakistan, por Diana përfundimisht e kishte refuzuar këtë ide.
Ai tha se ishte Diana ajo që i dha fund lidhjes pasi u kthye nga një pushim me Mohamed Al-Fayed dhe familjen e tij në korrik 1997. Pak më vonë, ajo nisi lidhjen me djalin e Al-Fayed, Dodi Fayed, i cili humbi jetën së bashku me Dianën në aksidentin automobilistik në Paris më 31 gusht 1997.
