Kryeministri Edi Rama ka reaguar ndaj akuzave se arrestimet dhe procedimet e zyrtarëve të lartë janë dëshmi se Shqipëria është “mbytur nga korrupsioni”.
Në adresimin e tij, Rama argumentoi se, sipas tij, ndodh e kundërta: fakti që drejtësia heton dhe prek ministra, drejtorë dhe kryetarë bashkish tregon se institucionet e drejtësisë po veprojnë të pavarura nga pushteti politik.
Rama tha se synimi i tij është që Shqipëria të bëhet pjesë e Bashkimit Europian brenda kësaj dekade dhe që drejtësia të jetë e pavarur prej tij.
“Në asnjë vend të mbytur me korrupsion nuk ka luftë frontale kundër korrupsionit. Në asnjë vend të mbytur prokuroria nuk heton vetë pushtetin, por i mbron ata. Në asnjë vend drejtësia nuk prek ministra, drejtorë, kryetarë bashkish, por vetëm rri dhe pret urdhrin e pushtetit për të goditur kundërshtarët.”
Duke iu përgjigjur kritikave të opozitës, kryeministri solli si shembuj 21 Janarin dhe Gërdecin, duke argumentuar se në të kaluarën drejtësia, sipas tij, pengohej nga pushteti.
“Vendin e mbytur në korrupsion e kemi jetuar të gjithë, ku kryetari i opozitës burgosej me urdhër nga lart, ku protestuesit vriteshin me plumba të paguar nga taksapaguesit, ku fletëthirrjet e prokurorisë për vrasjet shtetërore në mes të bulevardit bëheshin letra higjienike në zyrën e kryeministrit, që denigronte prokuroren si ‘lavire bulevardi’.”
Rama përmendi edhe tragjedinë e Gërdecit, duke e lidhur atë me atë që ai e cilësoi si korrupsion shtetëror dhe theksoi se çështja është rihapur dhe po hetohet.
“26 të pafajshëm të vrarë në shpërthimin e një projekti korruptiv të Ministrisë së Mbrojtjes u trajtuan si viktima të fatkeqësisë natyrore. Ata katër të vrarë në bulevard nuk kanë marrë drejtësi.”
Në fjalën e tij, Rama tha gjithashtu se qeveria nuk ka kompetencë për arrestime dhe se ndarja e pushteteve është pjesë e sistemit demokratik.
“Ne nuk arrestojmë. Qeveria nuk bën arrestime. Partia në pushtet nuk merret me arrestime. Pushteti ekzekutiv në demokraci nuk ka lidhje me arrestimet”, deklaroi ai.