Ministri i Jashtëm rus, Sergey Lavrov, ka hedhur poshtë thirrjet e homologut gjerman, Johann Wadephul, që Moska të heqë dorë nga “hapat e rrezikshëm përshkallëzues”, duke akuzuar Berlinin se është një prej mbështetësve kryesorë të Ukrainës.
Lavrov dhe Wadephul u takuan në kuadër të Asamblesë së Përgjithshme të OKB-së, në një takim të paparalajmëruar më herët. Sipas palës ruse, ishte ministri gjerman ai që kërkoi zhvillimin e bisedimeve.
Takimi shënoi kontaktin e parë në nivel ministrash të Jashtëm mes Rusisë dhe Gjermanisë që prej vitit 2022, kur nisi pushtimi rus i Ukrainës.
Gjatë bisedimeve, Wadephul i bëri thirrje Moskës të heqë dorë nga “shtegu i rrezikshëm i përshkallëzimit”, ndërsa shprehu gatishmërinë e Berlinit për përmirësimin e marrëdhënieve me Rusinë, nëse Kremlini tregon vullnet për t’i dhënë fund luftës në Ukrainë.
Lavrov iu përgjigj publikisht këtyre qëndrimeve, duke kritikuar deklaratat e kancelarit gjerman Friedrich Merz për forcimin e kapaciteteve ushtarake të Gjermanisë.
“Kancelari Merz thotë se Gjermania duhet të jetë sërish fuqia e parë ushtarake në Evropë. A e kupton Berlini se çfarë mund të sjellë kjo? Nuk kanë mësuar gjë gjermanët nga leksionet e Luftës së Dytë Botërore?”, deklaroi Lavrov.
Pas fjalimit, në një konferencë për mediat, kryediplomati rus u pyet për takimin me homologun gjerman dhe mundësinë e dialogut mes dy vendeve.
“Asgjë e re nuk erdhi nga nisma e ministrit të Jashtëm. Ai thjesht përsëriti qasjen e tij publike, duke dënuar Rusinë. Ju mund ta gjykoni vetë nëse kjo vlen për dialog apo jo”, tha Lavrov.
Marrëdhëniet mes Berlinit dhe Moskës janë përkeqësuar ndjeshëm që prej nisjes së luftës në Ukrainë. Në fillim të shtatorit, Gjermania akuzoi Rusinë për përfshirje në sulmin me dron ndaj aeroportit të Lajpcigut në gusht.
Berlini njoftoi më pas masa të reja ndaj Moskës, përfshirë mbylljen e konsullatës ruse në Bon dhe të qendrës kulturore ruse në Berlin, të cilën autoritetet gjermane e kanë konsideruar si të lidhur me veprimtari spiunazhi.
Gjermania ka paralajmëruar gjithashtu kontrolle më të forta kufitare për shtetasit rusë dhe rritje të presionit ndaj të ashtuquajturës “flota hije” e Rusisë.