Noka sulmon Ramën: I ka hyrë lepuri në bark, strumbullar i skandaleve shtetërore

Sekretari i Përgjithshëm i Partisë Demokratike, Flamur Noka, ka reaguar lidhur me adresimin publik të bërë sot nga kryeministri Edi Rama.

Në një postim në rrjetet e tij sociale, Noka shprehet se Rama është frikësuar nga skandali që ka përfshirë Shërbimin Informativ Shtetëror dhe për këtë arsye iu shmang dhënies së llogarisë dhe përballjes së hapur me gazetarët për këtë çështje.

Noka akuzoi Ramën se është shkaku i të gjitha skandaleve shtetërore. 

Reagimi i plotë:

Rama shmangu përballjen me gazetarët.  Anulloi konferencën për shtyp.

Shqiptarët prisnin reagimin e tij për skandalin shtetëror që mban emrin Vlora Hyseni, të cilën e emëroi në krye të SHISH. Mirëpo i ka hyrë lepuri në bark, aq sa nuk e pati burrërinë t'i bënte ballë pyetjeve që gazetarët do i drejtonin. Zgjodhi t'i fliste një kamere.

Sot shqiptarët prisnin që Edi Rama të jepte llogari për vendimet e tij politike, sepse emërimet e tij janë përgjegjësia e tij politike.

Shqiptarët prisnin dorëheqjen, por dëgjuan një monolog të përsëritur. Panë një paburrëri shtetërore, një ngutje për t'ia hedhur edhe kësaj radhe me një fjalim të rishkruar.

Edi Rama vendosi shtetin në dispozicion të krimit.

Kartelet kontrollojnë karriget e larta të shtetit, përfshirë kryeministrin.

Sot Shqipëria nuk ka siguri kombëtare. 

SHISH dhe Policia e Shtetit kontrollohen nga Ergys Agasi. Bashkëpunëtorët sekretë të SHISH dhe policisë i ka në xhep Agasi, Suel Çela, Troplinët dhe Xhabaftët. Ministrin e Mbrojtjes e kontrollon Agasi me ortakun Ron Yeffet. 

Për asgjë nga këto nuk guxoi të përgjigjet Edi Rama. Të gjithë e dinë psenë. Ai është strumbullari i këtyre skandaleve shtetërore. Ai është kurbani i fundit i narkoshtetit që krijoi. Ka radhën./CNA