Zvicra triumfoi me rezultatin 3-0 ndaj Maqedonisë së Veriut në Shkup, por vëmendja nuk ishte vetëm te fitorja. Në fushë mungoi kapiteni Granit Xhaka, ndërsa prania e tij u ndje përmes mbështetjes që mori nga tifozët zviceranë.
Xhaka pritet të mungojë të paktën në tri ndeshjet e ardhshme të Ligës së Kombeve, në një periudhë kur ndaj tij po zhvillohet një hetim në Zvicër lidhur me një çështje të vaksinimit kundër COVID-19.
Sipas akuzës, mesfushori dyshohet se ka siguruar një vërtetim vaksinimi pa e kryer vaksinën. Xhaka ka dhënë versionin e tij për ngjarjen dhe ka kërkuar falje, ndërsa mjekja e përfshirë në çështje e ka kundërshtuar këtë version, duke deklaruar se e ka vaksinuar personalisht futbollistin dhe se dokumenti është i rregullt.
Në pritje të përfundimit të hetimeve, Xhaka dhe përfaqësuesit e Federatës Zvicerane kanë vendosur që ai të mos grumbullohet për këto ndeshje, me synimin për të shmangur shpërqendrimet rreth ekipit.
Megjithatë, mungesa e kapitenit është ndjerë edhe në fushë. Gazeta zvicerane “Blick” e ka vënë në dukje rëndësinë e Xhakës për skuadrën, ndërsa mesfushori Remo Freuler u shpreh:
“Nuk kemi nevojë të flasim për Granitin. Ai është i pazëvendësueshëm. Shpresojmë që Graniti të kthehet shpejt dhe gjërat të rregullohen.”
Mbështetja për kapitenin nuk mungoi as nga tribunat. Tifozët zviceranë brohoritën disa herë emrin “Granit Xhaka”, ndërsa në stadium u shfaq edhe një banderolë me mesazhin:
“Liri për Xhakën”.
