Adresimi i Ramës/ Gazetari: "Lau duart" nga skandali i SHISH-it, vetë doli i ndershëm

Gazetari Mentor Kikia ka reaguar me nota ironuzuese pas adresimit publik të kryeministrit Edi Rama.

Përmes një postimi në “Facebook”, Kikia shprehet se me deklaratat e tij, Rama ‘lan duart’ nga skandali i SHISH-it.

Sipas gazetarit, Rama i la përgjegjësinë ish-drejtueses së SHISH-it, Vlora Hyseni, ndërsa nuk ngurroi të hedhë edhe akuza drejtuar Prokurorisë së Posaçme, se ka hyrë në “oborrin” e politikës.

Kikia shton se Rama sot u përbetua para shqiptarëve për ndërshëmëri, foli vetëm për veten, ndërsa të tjerët që i përkasin mazhorancës politike duhet t’ia dalin vetë.

Reagimi i plotë:

Rama lan duart nga të gjithë: Unë vetë jam i ndershëm!

Edhe Vlora Hyseni ka vepruar me kokë të vet, për llogari të vet dhe duhet tu dalë për zot vetë akuzave. Kryministri tha se nuk dinte e as kishte pse ta dinte se çfarë mund të ketë bërë shefja e SHISH.

Megjithatë ai e akuzoi SPAK-un se “ka hyrë në oborrin e politikës” e po bën politikë me dosje.

Ndërsa më pas u krenua për ngritjen e SPAKU-ut që po lufton korrupsionin.

Por, ajo që dalloi në këtë “mesazh për popullin”, ishte përbetimi për ndershmërinë e tij. Ishte një distancim i hapur nga qeveria dhe mazhoranca politike, ata që janë në burg, ata që janë në gjyq, ata që janë nën hetim e ata që mund të vihen nën hetim në të ardhmen.

Sot Rama foli vetëm për Edin!

Ai përsëriti shprehjen se “nuk ka bir nëne të gjejë një qindarkë të vetme nga paratë e tij në xhepin tim dhe familjes time”, dhe se askush në këtë vend nuk ka fituar një lek në mënyrë të pa ligjshme, me një firmë të hedhur prej tij.(Kjo ndoshta ngaqë Rama s’para firmos vetë).

Ai nuk tha se nuk ka para të vjedhura në xhepat e ministrave dhe drejtorëve, apo me firmat e ministrave dhe drejtorëve, por “në xhepat e mi dhe me firmën time”.

Ai sot tha vetëm “Unë, unë, unë, unë”.

“Unë e bëra drejtësinë; unë ia dhash shpatën që po pret koka; unë luftoj korrupsionin; unë do e çoj vendin në BE; unë e dua këtë vend; unë e dua flamurin kuq e zi; unë do të bëj histori dhe jo pasuri”.

Gjatë këtyre ditëve të “romancës” Gysi-Vlora, të cilën ai e ndoqi nga Nju Jorku, mesaduket Rama ka kuptuar se e vetmja gjë që mund dhe duhet shpëtuar tani është ai vetë, si mundësia e vetme për të vazhduar qeverisjen.

Rama sot iu drejtua popullit, për të thënë se tashmë duhet të kenë besim vetëm tek ai. Vetëm tek ai të kenë shpresë.

Të tjerët, ata që kanë hedhur firma apo kanë bërë “plaçkë”, të bëjnë ç’të munden, ti dalin vetes për zot, për çfarë ka dalë në dritë deri sot, e mbi të gjitha, për çfarë mund të dalë në të ardhmen./CNA