Familjarët, miqtë dhe drejtuesit e Forza Italia-s po përgatiten të përkujtojnë Silvio Berlusconin me një seri aktivitetesh, me rastin e 90-vjetorit të lindjes së ish-kryeministrit italian, i cili shënohet të martën, më 29 shtator.
Nga Villa Certosa në Sardenjë deri në Napoli, aktivitetet do të zhvillohen në vende që lidhen ngushtë me jetën, karrierën dhe trashëgiminë e Berlusconit, themeluesit të Mediaset dhe Forza Italia-s.
Një prej momenteve më simbolike do të jetë takimi familjar i organizuar nga pesë fëmijët e Berlusconit në Villa Certosa, në Porto Rotondo të Sardenjës. Zgjedhja e kësaj rezidence ka një domethënie të veçantë, pasi vila pritet të kalojë përfundimisht në pronësi të re, pas shitjes te sheiku i Katarit për rreth 350 milionë euro.
Përtej përkujtimit të babait të tyre, takimi do të shërbejë edhe si një lamtumirë simbolike për një prej rezidencave më të lidhura me figurën e Berlusconit. Për vite me radhë, Villa Certosa ishte skenë e takimeve, pritjeve dhe momenteve që u bënë pjesë e historisë së tij publike dhe politike.
Edhe në Napoli, më 29 shtator, do të zhvillohet një aktivitet i veçantë për nder të ish-kryeministrit italian. Nisma është ndërmarrë nga koordinatori i Forza Italia-s në Kampania dhe kreu i Eurogrupit të partisë, Fulvio Martusciello, së bashku me senatorin Maurizio Gasparri.
Organizatorët kanë zgjedhur një format ndryshe nga ceremonitë tradicionale përkujtimore. Në vend të një shërbimi fetar apo një konference me fjalime zyrtare, aktiviteti do të zhvillohet në një skenografi të frymëzuar nga televizioni, mediumi që luajti një rol qendror në jetën publike dhe politike të Berlusconit.
Në Sala Italia do të ndërtohet një skenë që ngjan me një studio televizive, me një ekran të madh në qendër dhe një ambient të konceptuar si një dhomë ndenjeje përpara televizorit.
Në orën 17:00, dritat do të fiken dhe në ekran do të shfaqen pamje nga jeta dhe karriera politike e Berlusconit. Përmes imazheve do të rikthehen disa prej momenteve më të rëndësishme të rrugëtimit të tij, nga sipërmarrja dhe televizioni deri te politika italiane.
Sipas Martusciellos, formati synon të rikujtojë pikërisht lidhjen e fortë të Berlusconit me televizionin dhe mënyrën se si ai e përdori ekranin për të ndryshuar komunikimin politik.
“Është një mënyrë ndryshe, por jo më pak intensive, për të treguar historinë e një njeriu që luajti në televizion dhe, përmes ekranit, ndryshoi mënyrën e komunikimit në politikë”, u shpreh Martusciello.
Sondazh
Lexo gjithashtu
