Kreu i Lëvizjes “Shqipëria Bëhet”, Adriatik Lapaj, deklaroi se nëse Partia Demokratike kërkon bashkëpunim, kushti është reforma e Kodit Zgjedhor.
Në një intervistë për A2CNN, Lapaj tha se opozita duhet të krijojë një front të përbashkët, por theksoi se reforma zgjedhore është një kusht i panegociueshëm për bashkëpunim.
“Ne besojmë si lëvizje se ky vend ka nevojë për ndryshim, është e nevojshme që opozita të krijojë një front të madh përballë të keqes sepse jemi në një emergjencë të madhe. Por, të mos mendojë askush se nga nevoja që kemi ta shporrim Edi Ramën, mund të na përdorin. PD-ja dhe i gjithë spektri opozitar, nëse duan bashkëpunim, duhet të binden se kemi kusht të panegociueshëm Kodin Zgjedhor, sepse shqiptarët e këtij shekulli meritojnë të votojnë si njerëz të lirë dhe të qeverisen nga qeveri demokratike”, tha Lapaj.
Sipas tij, nuk do të ndodhë më që “të heqim një të keqe për një të keqe tjetër”.
“Të gjithë ata në opozitë të kuptojnë që duhet të jemi bashkë së pari për Kodin Zgjedhor sepse në fund, me zgjedhje do të ndryshojnë gjërat. Do të bëhen zgjedhje për qeverinë e radhës. Në këtë kuptim, e kemi kusht të panegociueshëm reformën e Kodit Zgjedhor”, shtoi Lapaj.
