Simbolikë diplomacie/ Kina dërgon 2 panda në SHBA

Kina dërgoi këtë të diel dy panda gjigante në Shtetet e Bashkuara, siç njoftuan mediat shtetërore.

Transferimi i pandave ishte rënë dakord më parë, por Kina njoftoi nisjen e tyre të enjten, gjatë vizitës së Presidentit Xi Jinping në Uashington.

Këta gjitarë bardh e zi gëzojnë popullaritet të jashtëzakonshëm në mbarë botën dhe Kina i jep ata hua si pjesë e një programi të njohur si "diplomacia e pandave" për të forcuar marrëdhëniet me vendet e tjera.

Pandat me emër Ping Ping dhe Fu Shuang u nisën nga Aeroporti Ndërkombëtar Chengdu Shuangliu me një fluturim të posaçëm charter.

Për t'i mbajtur pandat të ushqyera gjatë fluturimit 15-orësh, janë përgatitur bukë misri të gatuara me avull, filiza bambuje dhe karota, raportoi media shtetërore kineze "Global Times". 

Pandat po dërgohen në një kopsht zoologjik në Atlanta, Georgia, ku do të kalojnë 10 vitet e ardhshme.

Një ceremoni lamtumire për dyshen u organizua para nisjes së tyre nga Qendra Kërkimore e Chengdu-s për Mbarështimin e Pandave Gjigante. Kujdestarë me përvojë u dërguan nga pala amerikane për të shoqëruar pandat gjatë fluturimit.