Irani thotë se po pret përgjigjen “përfundimtare” të Shteteve të Bashkuara ndaj propozimit të tij për rihapjen e Ngushticës së Hormuzit, pavarësisht se presidenti amerikan Donald Trump e ka hedhur poshtë publikisht ofertën, duke e cilësuar atë “të papranueshme”.
Sipas propozimit të Teheranit, Ngushtica e Hormuzit do të rihapej brenda shtatë ditësh dhe SHBA-ja dhe Irani do të rikthenin bisedimet për një marrëveshje të re. Në këmbim, Teherani kërkon që Uashingtoni të përmbushë disa kushte, përfshirë heqjen e bllokadës detare ndaj porteve iraniane dhe lehtësimin e presionit ekonomik e ushtarak ndaj Iranit.
Ministri i Jashtëm iranian, Abbas Araghchi, tha se Teherani ka parë reagimin e parë të Trumpit, por ende nuk ka marrë një përgjigje zyrtare përmes ndërmjetësve.
“Pamë reagimin e parë nga presidenti i SHBA-së, por ende nuk na është përcjellë asgjë nga ndërmjetësit”, tha Araghchi.
Ai shtoi se Trump ka bërë deklarata të ndryshme dhe kontradiktore për këtë çështje, ndërsa Irani pret që qëndrimi përfundimtar i SHBA-së t’i përcillet përmes ndërmjetësve.
“Po presim që mendimi përfundimtar të na përcillet nga ndërmjetësit dhe do të marrim një vendim bazuar në këtë”, tha ministri iranian.
Trump e hodhi poshtë të shtunën propozimin e Teheranit për rihapjen e Ngushticës së Hormuzit, duke e cilësuar atë “të papranueshëm”.
“Ata duan të bëjnë një marrëveshje për ta hapur menjëherë ngushticën, sepse po humbasin shumë”, tha Trump. “Edhe mua më pëlqen të bëj një marrëveshje, por ajo marrëveshje nuk do të ishte e pranueshme.”
Propozimi iranian u bë publik gjatë vizitës së zyrtarëve të lartë të Teheranit në Nju Jork, ku morën pjesë në Asamblenë e Përgjithshme të Kombeve të Bashkuara dhe zhvilluan kontakte me zyrtarë amerikanë.
Araghchi nuk ka bërë publike të gjitha kushtet e propozimit, por ka thënë se ato nuk përmbajnë asgjë më shumë sesa parashikohej në Memorandumin e Mirëkuptimit SHBA-Iran, të nënshkruar në qershor dhe që më pas u rrëzua pas rifillimit të luftimeve.
Sipas ministrit iranian, nëse plotësohen kushtet e kërkuara, lundrimi në Ngushticën e Hormuzit mund të rikthehet në normalitet brenda shtatë ditësh.
“Zgjedhja tani u takon Shteteve të Bashkuara”, u tha Araghchi gazetarëve gjatë vizitës në Nju Jork.
“Nuk mund të bombardosh një vend, ta kërcënosh me shfarosje, të vendosësh bllokadë detare dhe masa shtrënguese dhe më pas të presësh që siguria dhe lundrimi të rikthehen automatikisht”, shtoi ai.
Nga ana tjetër, një zyrtar i Shtëpisë së Bardhë i tha CNN se SHBA-ja po zhvillon “diskutime pozitive dhe konstruktive përmes ndërmjetësve”.
“Shtetet e Bashkuara janë në një pozicion shumë të fortë, me kontrollin e Ngushticës së Hormuzit, ndaj nuk jemi me nxitim”, tha zyrtari.
Sekretari amerikan i Shtetit, Marco Rubio, mbajti një qëndrim të ngjashëm gjatë kësaj jave, duke deklaruar se çdo marrëveshje me Iranin do të kërkonte “shumë punë të vështirë gjatë një periudhe kohore”.
Ndërkohë, duke cituar zyrtarë amerikanë, gazeta “The Wall Street Journal” raportoi të premten se Trump u ka thënë stafit të tij se një fushatë e re bombardimesh ndaj Iranit mund të jetë e mundur pas zgjedhjeve të ardhshme të mesmandatit në SHBA. Sipas zyrtarëve të cituar nga gazeta, qëndrimi i Trumpit mund të ndryshojë gjatë javëve të ardhshme.
CNN i është drejtuar Shtëpisë së Bardhë për një koment lidhur me këtë raportim.
Gjatë fjalimit të tij në Asamblenë e Përgjithshme të OKB-së, Trump tha se përballë tij qëndronte një vendim i rëndësishëm: arritja e një marrëveshjeje me Iranin apo vijimi i përballjes me Republikën Islamike.
“Kam një vendim të madh për të marrë – a do të arrihet një marrëveshje me Iranin që do t’i lejojë ata të rindërtojnë dhe të krijojnë një vend shumë më të madh se sa ka qenë ndonjëherë më parë?”
“Apo ta shkatërroj Republikën Islamike dhe ta bëj shpejt, duke mos u dhënë më kurrë atyre një shans për të vrarë dhe shkatërruar njerëz dhe vende?”
Ndërkohë, zëdhënësi i ushtrisë iraniane, Mohammad Akraminia, tha të dielën se SHBA-ja mund të ndërmarrë një sulm të ri ndaj Iranit për shkak të “situatës së keqe rajonale”, raportoi Reuters.
Sipas tij, Teherani është i përgatitur për çdo përballje. /CNN
