Një 56-vjeçar shqiptar, i identifikuar si Hasan Billa, është arrestuar në Shtetet e Bashkuara nga Zyra e Bostonit e Shërbimit të Emigracionit dhe Doganave, në kuadër të një operacioni të autoriteteve amerikane.
Sipas raportimeve të mediave të huaja, Billa përballet me disa akuza, të lidhura me një hetim të zhvilluar më 28 maj në Hartford, Connecticut, kundër shfrytëzimit dhe abuzimit të të miturve.
Mes akuzave të ngritura ndaj tij janë tentativa për sulm seksual të shkallës së dytë, tentativa për abuzim seksual ndaj një të mituri, si dhe tentativa për kontakt seksual me një person nën moshën 16 vjeç.
Operacioni u zhvillua nga Policia e Hartfordit në bashkëpunim me Task Forcën e FBI-së për Krimet Kundër Fëmijëve dhe Trafikimin e Qenieve Njerëzore.
Sipas autoriteteve, një detektiv i infiltruar kishte krijuar një profil online duke u paraqitur si një vajzë 15-vjeçare. Hetuesit pretendojnë se Billa dhe dy persona të tjerë udhëtuan drejt një adrese në Hartford, me synimin për t'u takuar me personin që ata besonin se ishte një e mitur.
Të tre personat u arrestuan pa incidente. Në fazën fillestare të procedimit, për secilin prej tyre u përcaktua një garanci prej 500 mijë dollarësh.
ICE njoftoi arrestimin e Billës më 25 shtator, duke e përfshirë atë në kuadër të operacioneve të synuara të agjencisë në zonën e Wolcott.
Deri në momentin e raportimeve, ndaj 56-vjeçarit nuk ishte dhënë një vendim përfundimtar nga gjykata. Akuzat ndaj tij mbeten pretendime që duhet të shqyrtohen në procesin gjyqësor, ndërsa vlen parimi i prezumimit të pafajësisë deri në një vendim të formës së prerë.
Autoritetet amerikane nuk kanë bërë publike detaje të mëtejshme lidhur me statusin e emigracionit të Billës, ndërsa nuk është bërë e qartë nëse ai ndodhet aktualisht në paraburgim të ICE.
Sondazh
Lexo gjithashtu
