Nëna simbol i dhimbjes së Kosovës në protestë, Ferdonije Qerkezi në mbështetje të krerëve të UÇK-së

Këtë të diel në Gjakovë u mbajt protesta kundër aktgjykimit dënues ndaj drejtuesve të UÇK-së, e thirrur nga “Kuqezinjtë e Jakovës”.

Me këtë rast, qytetarët i shprehën mbështetje çlirimtarëve në Hagë. Në protestë mori pjesë edhe Nëna Ferdonije Qerkezi, e cila gjatë luftës në Kosovë humbi bashkëshortin dhe katër djemtë e saj.

Protesta me marsh kundër dënimit të padrejtë të çlirimtarëve “Jo në emrin tim” u përmbyll me flakadanë.

Nëna Ferdonije Qerkezi, nga Gjakova, është bërë e njohur si simbol i dhimbjes së familjeve të të zhdukurve gjatë luftës në Kosovë dhe i kërkimit për drejtësi. Më 27 mars 1999, policia serbe i mori nga shtëpia bashkëshortin, Halim Qerkezin, dhe katër djemtë: Artanin, Armendin, Ardianin dhe Edmondin. Më i vogli, Edmondi, ishte vetëm 14 vjeç.

Ajo e ktheu shtëpinë e familjes në shtëpi-muze, duke ruajtur rrobat, këpucët, fotografitë dhe sendet personale të bashkëshortit e të djemve. Kjo shtëpi është bërë një vend kujtese për viktimat e luftës dhe dëshmi e tragjedisë së familjes së saj.

Tavolina e shtruar me gjashtë pjata me ushqim është një nga imazhet më të njohura të nënës Ferdonije Qerkezi. Një pjatë për veten, një për bashkëshortin dhe katër për djemtë e saj, të marrë nga forcat serbe gjatë luftës, ndërsa ajo ulet e vetme në tavolinë dhe pesë vendet e familjarëve mbeten bosh.

Tavolina simbolizon pritjen, mungesën e familjes dhe kërkesën për të vërtetën e drejtësinë. Historia e saj u bë e njohur edhe ndërkombëtarisht. Në vitin 2019, dëshmia e saj iu paraqit Komisionit për Punët e Jashtme të Dhomës së Përfaqësuesve të SHBA-së, në seancën për viktimat e luftës në Kosovë dhe kërkimin e drejtësisë.