Policia e Kukësit tre operacione në 24 orë, në pranga 3 persona, sekuestrohen armë dhe municione
Tre operacione policore janë finalizuar gjatë 24 orëve të fundit në qarkun e Kukësit, duke çuar në pranga tre persona. Dy prej operacioneve janë zhvilluar në Tropojë, ku janë goditur raste të armëmbajtjes pa leje dhe kultivimit të bimëve narkotike, ndërsa operacioni i tretë ka zbardhur dy vjedhje me thyerje në Kukës.
Në kuadër të operacionit “Befasia”, shërbimet e Komisariatit të Policisë Tropojë, në bashkëpunim me strukturat e DVP Kukës, arrestuan 45-vjeçarin E. M., banues në Markaj. Gjatë kontrollit të banesës, në zbatim të vendimit të Gjykatës, policia gjeti dhe sekuestroi një armë zjarri automatike dhe municion luftarak.
Ndërkohë, në kuadër të operacionit “Weekend”, u arrestua në flagrancë 38-vjeçari S. H. Ai dyshohet se kishte kultivuar 42 bimë kanabis në një zonë të pyllëzuar në territorin e Njësisë Administrative Tropojë e Vjetër.
Gjatë kontrollit fizik, policia i gjeti një armë zjarri pistoletë me krehër dhe 9 fishekë. Në banesën e tij u sekuestruan gjithashtu një armë gjahu, municion dhe një armë e ftohtë.
Rasti i tretë lidhet me operacionin “Hija”, të zhvilluar nga shërbimet e Komisariatit të Policisë Kukës në bashkëpunim me strukturat e DVP Durrës. Si rezultat i veprimeve hetimore, u kap 31-vjeçari I. J., banues në Krumë të Hasit, i dyshuar për dy vjedhje me thyerje.
Sipas Policisë, në orët e para të mëngjesit të 26 shtatorit, 31-vjeçari ka vjedhur një automjet dhe më pas ka thyer e vjedhur në një lokal. Në cilësinë e provës materiale u sekuestruan automjeti i vjedhur, një celular i marrë në lokal dhe një thikë.
Policia vijon hetimet për dokumentimin e vjedhjeve të tjera, për të cilat I. J. dyshohet se mund të jetë autor në zonat e Hasit dhe Durrësit.
