Gjykata e Posaçme kundër Korrupsionit dhe Krimit të Organizuar (GJKKO) ka shtyrë për në datën 12 tetor seancën gjyqësore për dosjen “Partizani”.
Në këtë çështje gjykohet ish-kryeministri Sali Berisha, së bashku me persona të tjerë të pandehur.
Shkak për shtyrjen e seancës është bërë mungesa e avokatëve mbrojtës. Asnjë prej avokatëve nuk është paraqitur në seancën e radhës.
Mungesa e tyre lidhet me bojkotin e vendosur nga Dhoma Kombëtare e Avokatisë, në kuadër të protestës së avokatëve ndaj problematikave që ata kanë ngritur lidhur me sistemin e drejtësisë.
Në dosjen “Partizani”, Sali Berisha akuzohet nga SPAK për “korrupsion pasiv të funksionarëve të lartë shtetërorë”, në bashkëpunim.
Sipas akuzës, gjatë kohës kur ishte kryeministër, Berisha dyshohet se ka përdorur funksionin dhe autoritetin e tij shtetëror për të favorizuar dhëndrin e tij, Jamarbër Malltezin, në procesin që lidhej me pronat e ish-kompleksit sportiv “Partizani”.
Prokuroria pretendon se Berisha ka ndërhyrë përmes vendimeve, akteve ligjore dhe administrative, të cilat kanë ndihmuar në krijimin e kushteve për kthimin dhe privatizimin e pronave, si dhe për zhvillimin e tyre më pas nga Malltezi.
