Gjyqtarët refuzuan takimin me Ramën/ Zbardhet e-maili i Kryeministrisë

Kryeministria u është përgjigjur me e-mail gjyqtarëve dhe prokurorëve pasi refuzuan për të marrë pjesë në tryezën e thirrur nga Rama në lidhje me pagat e drejtësisë.

Në përgjigjen e dërguar me e-mail thuhet se janë vlerësuar shkaqet e paraqitura prej përfaqësuesve të drejtësisë duke theksuar se janë të hapur për të vijuar dialogun në një moment të dytë me ta.

 “Duke ju falënderuar për komunikimin dhe sqarimet e përcjella lidhur me kërkesën për shtyrjen e takimit të sotëm, mirëkuptojmë këtë kërkesë, ndonëse vlerësojmë se dialogu dhe bashkëpunimi ndërinstitucional ndërmjet aktorëve të ndryshëm të sistemit të drejtësisë mbetet i rëndësishëm dhe, në parim, i pavarur nga procese të tjera që mund të zhvillohen paralelisht. Në çdo rast, mbetemi të hapur për vijimin e dialogut dhe për dakordësimin e një date tjetër për zhvillimin e takimit. Komunikimi u dërgua nga zyra e Sekretarit të Përgjithshëm të Kryeministrisë”, thuhet në e-mail.

Më tej është theksuar se Kryeministria do të vijojë punën për hartimin e ligjit të ri mbi pagat, mbi të cilin në e-mail thuhet se ishte përgatitur edhe një parashtrim i përgjithshëm, me synimin për ta shtruar si pjesë të diskutimit dhe dialogut të përbashkët gjatë takimit.