Pesë të arrestuar pranë bazës amerikane në Britani, fermerja: I pashë me maska dhe kapuçë

Një fermere britanike ka treguar për BBC-në momentet kur pa një grup burrash të maskuar dhe me kapuçë pranë bazës ajrore RAF Fairford, në Gloucestershire, në orët e para të së dielës.

Fermerja tha për programin “Today” të BBC-së se po kthehej në shtëpi pas një feste, kur rruga ishte bllokuar nga tre furgonë të bardhë, të cilët i konsideroi të dyshimtë. Pak më vonë, ajo pa një grup burrash duke u larguar me vrap nga zona.

Ajo telefonoi numrin e emergjencës 999 në orën 01:36, sipas orës lokale.

“Brenda 10 minutash, fshati ishte mbushur me policë të armatosur”, tha fermerja, duke shtuar se ishte thjesht fat që ajo kishte mbërritur në fshat në të njëjtën kohë me furgonët.

Fermerja kritikoi autoritetet, duke thënë se ato “e humbën rastin” për të parandaluar atë që po ndodhte. Megjithatë, Sekretari i Mbrojtjes, Wes Streeting, tha se ajo kishte vetëm “një pjesë të pamjes” së ngjarjes.

Streeting gjithashtu refuzoi të spekulonte mbi ndonjë lidhje të mundshme të të dyshuarve me Iranin, duke deklaruar se nuk po “vendoste një lidhje me Iranin”.

Policia e Gloucestershire bëri të ditur se ishte njoftuar për ngjarjen rreth orës 00:45 të së dielës. Pesë burra vijojnë të jenë në paraburgim. Ata janë arrestuar në bazë të ligjit për eksplozivët dhe nën dyshimin për përgatitjen e një akti terrorist.

RAF Fairford, e vendosur në zonën e Cotswolds, përdoret nga ushtria amerikane.

Presidenti i SHBA-së, Donald Trump, tha se pesë të dyshuarit ishin “nën vëzhgim prej kohësh” dhe se autoritetet amerikane “i kapën”.