Manchester City thyen heshtjen pas vendimit: “Ka shumë gjëra që nuk mund t’i themi”

Manchester City është përfshirë në një stuhi pas vendimit në lidhje me procedurën që sheh klubin të akuzuar për 115 shkelje financiare pas akuzave të ngritura nga Premier League. Procesi do të kalojë në fazën e apelit dhe kështu kryetari i Manchester City, Khaldoon Al Mubarak, ka publikuar një komunikatë në të cilën njofton se “procedura e Premier League ka ende shumë rrugë për të bërë dhe besimi dhe vendosmëria jonë për të dëshmuar pafajësinë e Klubit janë po aq të forta sa në fillim”. 

Në deklaratë lexohet e gjithë dëshira e klubit për të bërë dritë mbi çështjen, duke u përpjekur të përcjellë besim në të gjithë ambientin dhe të largojë çdo lloj shqetësimi në lidhje me sanksionet, dhe thuhet: “Ka shumë gjëra që do të doja t’i ndaja me ju për t’ju ndihmuar të kuptoni pse jemi kaq të sigurt për pozicionin tonë. Por konfidencialiteti i rreptë i procedurës ligjore dhe vendosmëria jonë për ta respektuar më pengojnë ta bëj këtë për momentin. Edhe kjo letër i është nënshtruar disa kontrolleve ligjore për të garantuar përputhshmërinë e saj”. Tani do të shkohet në apel, por është e qartë se të gjithë pyesin se çfarë do të ndodhë me Manchester Cityn. Bëhet fjalë nga gjobat te penalizimet në renditje, por edhe te përjashtimi nga kampionati.

Hetimi ka përfshirë një periudhë nga sezonet 2009/10 deri në 2022/23, gjatë së cilës klubi ka fituar 20 trofe, nga të cilët katër kampionate radhazi. Mes akuzave të ndryshme, janë edhe ato që kanë të bëjnë me paraqitjen e informacioneve financiare jo të sakta, shkeljen e parametrave që lidhen me Fair Play-n Financiar, si dhe manipulimin e kontratave të sponsorizimit, përveç mosdeklarimit të pagesave për disa lojtarë dhe jo vetëm. Në këtë moment nuk është e qartë se çfarë do të vendosë Premier League, por sigurisht bëhet fjalë për një çështje që do të ngjallë diskutime, duke qenë se bëhet fjalë për një klub prestigjioz, historik dhe sigurisht ndër më të pasurit e kampionatit anglez. 

Sipas rregullores së Premier League, dënimi mund të konsistojë në një penalizim në renditje, një gjobë ose madje në përjashtimin nga kampionati. Çdo skenar është i mundur, edhe pse Premier League nuk parashikon sanksione të përcaktuara paraprakisht për shkeljet e rregullave financiare. Pra, gjithçka mbetet për t’u parë. Ndërkohë Manchester City përpiqet t’i qetësojë në njëfarë mënyre tifozët e tij: “Edhe pse disa janë nxituar të nxjerrin përfundimet e tyre dhe ka shumë zhurmë rreth nesh, asgjë nuk ka ndryshuar. Ne kemi përballuar tashmë sfida së bashku dhe kemi dalë fitues prej tyre. Janë ende të shumtë ata që duan të dëmtojnë vrullin e Klubit tonë. Ne nuk do t’ua japim këtë mundësi”.