TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Komisioni i Ligjeve ka nisur shqyrtimin e nismës për hartën e re territoriale të vendit, me Partinë Socialiste që kërkon të ecë përpara me variantin për 46 bashki.
Në të njëjtën kohë, Partia Demokratike ka paraqitur një variant alternativ që parashikon 100 bashki. Opozita kërkon që edhe kjo nismë t’i nënshtrohet një raundi konsultimi publik, duke kundërshtuar procedurën e ndjekur nga mazhoranca.
Në komision, deputeti demokrat Oerd Bylykbashi akuzoi mazhorancën se po e çon më tej atë që ai e cilësoi si dështimin e reformës territoriale të vitit 2014.
“Nga keq, e çoni akoma më keq. Ne kemi propozuar kalimin në 100 bashki. Reforma 2014 ka sjellë erozion social dhe institucional. Kanë ikur njerëzit. Konsultimet tuaja publike me komunitetin janë false. Ju po e bëni si e do kryeministra. Duhet që bashkitë të mundin të qeverisin vendin në përditshmëri për qytetarët, edhe sikur të jenë 1 vit pa qeveri. Ju nuk jeni konsultuar me komunitetet”, deklaroi Bylykbashi.
Ai kërkoi që dy nismat të trajtohen në të njëjtën procedurë dhe që edhe propozimi i opozitës të kalojë përmes konsultimit publik.
“Nisma juaj dhe nisma jonë, duhet të bashkohen. Duhet të bëhet edhe për nismën tonë procedurën e konsultimit publik që bëtë për draftin tuaj. Ju vratë konsensus se donit të nxirrnit hartën tuaj me 46 bashki. Bashkoni nismën tuaj legjislative, bashkoni dy nismat dhe bëni procedurë të njëjtë”, tha deputeti demokrat.
Nga mazhoranca, kreu i Komisionit të Ligjeve, Ulsi Manja, deklaroi se procedura do të vijojë mbi projektligjin e paraqitur nga Partia Socialiste.
“Silleni nismën tuaj, kur ta kemi në tavolinë do flasim. Ky komision do të vijojë me shqyrtimin e projektligjit të sjellë nga Partia Socialiste”, u shpreh Manja.
Debate pati edhe nga deputeti demokrat Saimir Korreshi, i cili e ironizoi mënyrën dhe shpejtësinë me të cilën po trajtohet reforma.
“Po se Byrek është ky, nga ata të ngrirët që e fut në furrë e del për 4 minuta? Kjo nuk bëhet më një ditë. Edhe Diella me AI të kishte ardhur, nuk do ishte bërë. Nuk mund t’ua themi këtë shqiptarëve. Është dhe ky varianti ynë tjetër. I mirë i keq, le ta shohim. Duhet dëgjuar varianti tjetër”, deklaroi Korreshi.
Ai ngriti shqetësimin edhe për pasojat që mund të ketë ndryshimi i hartës administrative për qytetarët, veçanërisht në zonat ku distancat me qendrat e bashkive janë të mëdha.
“Jemi të mbaruar fare. Njësive vendose po ju bien tavanet. Do marrë qytetari dang dang autobusin 2 orë, për të shkuar në bashki të mbajë radhën, e jo më të zgjidhë gjë. Pres qafën unë po e shkel kryetari i bashkisë territorin. Do merret ai kryetar me gardhin?”, tha Korreshi.
Mazhoranca ndërkohë këmbëngul se do të vijojë me procedurën për variantin e saj me 46 bashki, ndërsa opozita kërkon që përpara miratimit të zhvillohet një tjetër proces konsultimi për alternativën me 100 bashki.
Debatet:
Korreshi: Faleminderit kryetar! Për të dalë në TV po e bëjmë këtë punë?
Manja: Po të përgjigjem direkt. Është seanca që dilet në TV.
Korreshi: E paske vënë kamerën që të dalësh mirë.
Manja: Kur flet ti, nuk dal unë.
Korreshi: Shyqyr që paskam krehur edhe flokët sot. Sa i përket rendit, mund të ndryshohet. Nuk është kalendari i vitit të ri që shkrepet një herë. Nuk është e vërtetë që nuk kemi qenë, siç thoni ju. Kemi qenë të pranishëm, si i kemi hartuar ne 401 faqe? Nuk është byrek që e fut në furrë dhe e nxjerr. Është punuar seriozisht. Na e bëtë si ligji i gjyqtarëve, që erdhi tjetër për tjetër dhe u miratuan ato për shpëlarje pa firma fare. Ne e kemi me 100, sepse në këtë përfundim kemi dalë, kemi folur me ekspertët më të mirë. Bëjmë dëgjesën me qytetarët, asnjë nuk e donte këtë hartë me 46 bashki dhe askush nuk e dontë. Ju prapë doni ta votoni. Kemi depozituar nismën ligjore. Ju nuk keni as shërbim urban, do rrinë qytetarët nga dy orë të presin. Dëgjojeni edhe propozimin tonë se nuk po themi të kthehemi te opingat. Nuk ka më zgjedhje nëpër njësi se janë të gjithë të emëruar ata. Thanë se do ulin numrin e punonjësit dhe e kanë rritur. Po të shkosh dhe t’i hysh shërbimit nëpër njësi, bën një denoncim dhe shkojnë me vrap të heqin plehrat. Unë pres qafën nëse kryetarët e bashkive i kanë shkelur ndonjëherë rrugët nëpër fshatra. Nuk merret kryetari i bashkisë me gardhet.
Manja: Gardhi nuk është në çështjet e diskutimit sot.
Korreshi: Unë fshatar jam, merrem dhe me gardhin. Propozimi final i imi, bazuar edhe në nenin 31. Fike mikrofonin tënd, të dal unë në TV, se jam më i bukur se ti.
Manja: Vazhdo, nuk ka problem.
Korreshi: Të ndryshohet rendi i ditës i nderuar kryetar, meqë edhe Baromi i hapi derën sigurisë kombëtare, i fortifikuam muret, të fusim edhe propozimin e PD, meqë kemi edhe këta miqtë nga qytetet, që të shkojnë nëpër punë, të pastrojnë rrugët, të bëjnë ndonjë punë. Se harxhojnë edhe naftë, e ke çuar 200 lekë.
