Zbulohen 6 lokale ku luheshin lojëra fati pranë shkollave në Tiranë, arrestohen 8 persona

Policia e Tiranës ka finalizuar operacionin e koduar “Barriera”, në kuadër të kontrolleve për goditjen e veprimtarive të paligjshme në dhe pranë institucioneve arsimore. Gjatë operacionit janë zbuluar 6 lokale në zona të ndryshme të kryeqytetit, ku zhvilloheshin lojëra fati dhe viheshin baste sportive përmes celularëve.

Në kuadër të operacionit janë arrestuar në flagrancë 8 persona, mes tyre dy punonjës të lokaleve, 20 dhe 23 vjeç, si dhe gjashtë persona të tjerë që, sipas policisë, u kapën duke vënë baste në ambientet e subjekteve.

Operacioni u zhvillua nga specialistët e Seksionit për Hetimin e Mashtrimeve Kibernetike, në koordinim me Prokurorinë, shërbimet e Komisariatit Nr. 2 dhe Forcën e Posaçme Operacionale. Sipas policisë, hetimi u krye përmes metodave proaktive, me fokus veçanërisht lokalet pranë institucioneve arsimore.

Gjatë kontrolleve, policia sekuestroi si prova materiale 10 pajisje, konkretisht një pajisje DVR dhe 9 celularë me faqe aktive për lojëra fati.

Sipas uniformave blu, kontrollet dhe hetimet do të vijojnë për identifikimin e personave të tjerë që mund të jenë përfshirë në këtë veprimtari të kundërligjshme.

Materialet procedurale janë referuar në Prokurori për veprime të mëtejshme.